Tuesday, December 25, 2007

كي لا ننسى جرائم نظام صدام حسين !

-----
الحمدلله صحتي وايد أحسن ولو إن الكحة لي الحين معاي
طلعت قبل أمس إلي أهو آخر يوم عطلة
وصارت مغامرات
LOL
-----
زايرينه الكويت عايلة من كندا وعايلة من جنوب أفريقيا
أصدقاء أبوي وإختي
وبما إن أبوي مسافر إختي قالتلي أساعدها بالبرنامج
قالوا يبون أماكن شعبية
قلت لهم سوق المباركية
قالوا مرونا الساعة 9 الصبح
آنا توهقت شنو 9 الصبح عندهم يعني جم أقوم؟
هذا آخر يوم عطلة أبي أنام
قاموا يضحكون
قالوا خلاص نامي مرونا الساعة 10
:p
-----
مريناهم الفندق ورحنا المباركية
آنا حافظة المباركية بكل دواعيسها
صفطنا السيارة بمكان ومشينا السوق كله من 10 لي 2 الظهر
ودليت طريج السيارة
والله استفدت من كثر ما أتمشى بالمباركية مع أبوي :)
وديتهم صوب محلات الجواتي قتلهم ياخذون من محل أبوي ببلاش
ولا المحل مصكوك والله فشلة :p
وديتهم محل دشداشة الصفاة شروا دشاديش
LOOOOOOOL
شكلهم يضحك
-----
رحنا محل يبيع براقع خليت الأم تلبس برقع وأصورها
جربت كل الأنواع وقعدت أصورها
واهي مو عارفة شلون تلبس والبياع يعلمها
متنا من الضحك والناس تيمعوا جمهور ويطالعونه
والبياع يقول يا محلاها الله يحفظها من العين
لوووووول شنو الحلو فيها مو مبين شي؟
:p
وقعد يمدحها والناس يضحكون يوم خلصنا بنروح
جان يصير واحد ثاني
عصب وقام يصرخ شنو ما شريتوا!!!
يعني بس يايين تصورون؟
إهي خافت آنا قلت الحين بطقها
قتله إهي جربتهم ماقدرت تتنفس وبعدين تشتريهم حق شنو؟
قام يتحلطم
جان تشتري واحد مسكينة :)
-----
الساعة 2 طلعنا من المباركية وايد استانسوا
وشروا اشكثر أغراض
كل ما أتصل على مطعم ما أحصل حجز
آخر شي أخوي حصل بمطعم دعوات الهندي
رحنا المطعم وأخوي يالنا هناك وتغدا معانا

-----
خلصنا غدا جان إختي تقول آنا تعبانة برد البيت
انتوا وصلوهم الفندق
أهم شي إنهم ربعها وقطتهم علينا :p
كانت الساعة 5 آنا استانست أخيرا بنرجعهم
كنت حدي تعبانة وبردانة من كثر ما مشينا
جان يقولون خنروح متحف !!!
قلت لهم ما تبون ترتاحون بالفندق وبالليل نطلع؟
قالوا لأ نروح متحف بعدين نرتاح
:/
آنا زين ما بجيت جدامهم
-----
كانوا يسإلوني وايد عن الغزو
فقلت خنوديهم بيت القرين
آنا من زمان ودي أروح له ولا عمري شفته
دزيت مسج حق البدالة
كتبت
بيت القرين
جان يردون علي بمسج على طول
وفي رقم تلفون نقال
قلت حق أخوي
كشخة بيت القرين عندهم موبايل
جان أتصل طلع لي واحد
عفوا هذا تلفون شنو؟
هذا محل
يعني مو بيت القرين؟
امبلا هذا بيت القرين
بيت القرين المتحف؟
يا بنت الحلال هذا محل أثاث اسمه بيت القرين
وي !
هاهها :)
-----
جان أخوي يقول يعرف متحف وطني على البحر
بس ما يدري إذا فاتحين
قلنا نروح نجرب

وصلنا ولا الباب مصكوك وفي جرس !

دقينا الجرس جان يطلع مصري شكله توه قايم من النوم

قال عادي دشوا

شرينا تذاكر ودخلنا

شكلهم بس يفتحون إذا أحد يا !







المتحف عجييييييب
كله مجسمات تبين الكويت أيام الغزو
وتمشون من غرفة لي غرفة وتسمعون شرح باللغة إلي تبونها
وبعدين تدشون قاعة تطالعون فلم عن إطفاء آبار النفط
وبعده في معرض صور
حده حلو آنا ما صورت وايد لأن كنت مندمجة
حتى اهمه اندمجوا وتأثروا وقعدوا يقرون ويطالعون
المعرض توثيق كامل لفترة الغزو وقبلها وبعدها
والشهداء والأسرى وشيوخنا وكل شي
إلي يتذكرون فترة الغزو راح يتأثرون ويبجون
آنا استانست إن أخوي معاي بالمتحف
لأن بالغزو كان عمره أربع سنين يعني ما يتذكر شي
فقعدت أوريه وأشرح له
-----
إذا تحبون الكويت أي أحد يزوركم من دولة ثانية ودوه هالمتحف
وأنصحكم تودون عيالكم وإخوانكم الصغار
لازم الناس يعرفون شنو إلي صار ويشوفون ويستفيدون
-----
بعد المتحف رحنا نوديهم الفندق
أخوي ودا مجموعة كندا فندقهم
آنا معاي الأم والولد من جنوب أفريقيا
الولد كسر خاطري
كلهم أعمارهم 40 وفوق وأهو عمره 18 أحسه ما استانس
دقيت على ولد خالتي سألته وين بيروحون اليوم؟
قالي اليوم ماكو طلعة في مباراتين مهمتين بنطالعهم
وقعد يشرح لي ريال مدريد ومادري شنو
ما أفهم بهالسوالف لأن حتى اخواني مو نوعهم يتابعون مباريات
سألت الأفريقي تبي تطالع مباراة مع عيال خالتي؟
أهو استانس! قتله تبي تروح الفندق وتروح لهم حق المياراة الثانية الساعة 9؟
قال لا بروح الحين
وديته بيت خالتي وصيتهم يتكلمون انجليزي حتى مع بعض
عشان ما يحس إن غريب ويطلبون له عشا معاهم
بعد شوي اتصل ولد خالتي
إحنا بنروح المسيد نصلي أهو مسلم؟
اسمه محمد اشفيكم! أكيد مسلم
LOL
-----
وصلت الأم فندقهم
جان أدعم !
واحد صافط عاللفة جان أشلع الصبغ وأفقص دعاميته شوية
:p
السيارة مافيها أحد قعدت أنطر
جان أكتب رقم أخوي بورقة وحطيتها


يوم رحت البيت قتله بيدق عليك واحد أو وحدة دعمت سيارتهم

heh :)

-----

24 comments:

True Faith said...

آنا شاكه فيج :P

o I'm back :P

Ra-1 said...

TF ...
بسم الله اشدراج إني كتبت موضوع
جاسوسة :p

شاكة بشنو؟؟؟

o welcome back :) lesh ma dagetay!

Anonymous said...

LOOL! wanasa! re7la illa il-mubarakeyyah =p

Anonymous said...

sounds like fun and embarkiaya for 3eed shopping must be crazy!

moodless said...

في البداية عيدج مبارك
وما تشوفين شر انشالله
ومبروك الزيادة ومنها للأعلى
..
قبل فترة سألني صديق وين يودي ربعه جايين من بره، قلتله سوق المباركية وبعض المتاحف
بالنسبة لنا الامر ممكن يكون مو مثير للاهتمام لانه اما حافظين المكان او ما يهمنا
..
متحف كي لا ننسى من الاماكن اللي المفروض يمرونها كل الصغار للتذكير وتعليمهم ماذا حصل في التسعين
بس يبدو ان هناك الكثير ممن لا يريدون ان يتذكروا :)


ما تشوفين شر انشالله

Anonymous said...

اول شي الحمد الله السلامه

و المباركيه دايما متروسه اجانب .. ايحبون التراث ..

اما المتحف انا رحتله من سنه يمكن .. صج مكان الواحد يفخر بوجوده بس اسف ينقصه العايه و المفروض ايصير وجهه رسميه حق كل الوفود الي اتي الكويت .. هذا تاريخنا اذا ماذكرنا الناس فيه ماراح يذكرونه ..

وزين سويتي مع الصبي خل يستانس مع الشباب ..

LiTTLE BiG said...

LOL >>> يا محلاها الله يحفظها
:p lol lesh ma 5athaiteny ma3ach :p

astanis 3ala 5a6ch kel te76en no8a6 :D

Anonymous said...

لوول كله صوب وزلقنا سيارتك بصوب ثاني:)

عيدك مبارك وكل ايامك سعيدة

marshmallows said...

loool e3jbtni salft zl'3na syartk ana kla chthe amshii o azl'3 bs a76 wrga aktb oops am sorry ;p

NewQ8 Bride said...

خطاج السو حبيبتي واااي عجيبة زلقنا سيارتك هاهاهاه

و الله المتحف امي عيزت منا انه نروح نشوف تعرفين امي عاد الوطنية عندها على طول مرتفعة بس و الله ما رحت انشالله بروح

ووناسة سوق المباركيه :)

ما تشوفين شر و الحمدالله على السلامة

True Faith said...

"o welcome back :) lesh ma dagetay!"

I'm saving the call for your birthday :P

Anonymous said...

عيدج مبارك وخطاج السوء ، ورحله ممتعة بصراحة ما قصرتي مع ضيوفكم يقول النبي صلى الله عليه وآله وسلم : ( من كان يؤمن بالله واليوم الآخر فليكرم ضيفه ) .

بس لو كاتبه طيرنا صبغة سيارتك بدال زلقناها جان كنتي أكثر واقعية ودقة :)

Shather said...

اهم شي زلقنا سيارتك :P

heheh

::heba:: said...

هاهاهاهاهاهاها
ra-1 ححسبي الله على ابليسج
والله مت من ضحك على سوالفج
:PPP

كلي شي بصوب
وبيت القرين بصوب :PPPP

تدرين كل ما اروح الدوام اجيك على بلوقج لوووول لاني صج استمتع بسوالفيج :DD

Ra-1 said...

outkasty ...
LOL e :p

Fast Lane-Speedo ...
:)

moodless ...
nice to see you here :)

Ra-1 said...

الخيلاء ...
صح يبيله دعاية
آنا توني أكتشفه!

LiTTLE BiG ...
Hehhe :p

Anonymous ...
:)

Ra-1 said...

marshmallows ...
ترا آنا أول مرة :p

New Bride ...
هاهها :)

خل أمج تودينا بيت القرين على يوم
ودي أشوفه !

TF ...
Okay sama7tech bas zeeday elhadaya ;)

Ra-1 said...

الطارق ...
آنا بس كتبت زلقنا سيارتك واخترع :p
دق على أخوي يقول خرعتوني آنا قلت سيارتي الحين كلها مدعمة
heh :)

Shather ...
:)

:heba: ...
هاهها أهم شي إني ونستج
:)

Anonymous said...

hi I love your blog!
Where is that museum i want to take my son.. 3ala el bahar easy to find?
LoL @ el burgaa3

OutOfReach said...

wanasa i loved your post a7eb sooog lembarkya wayed 9ij ewanes o0 zain sweetay m3a '6yo0fko0m :)
inshallah 3la 6ool mstanasa :)

Unknown said...

الصراحة هذا انسان امين :)
زلقنا السيارة :)

المهم الشغلة الثانية زين سويتي وديتهم المباركية يحبون هالسوالف:)

خوش موضوع والمتحف شكله يبيله زيارة

Ra-1 said...

: ShoSho : ...
تلفين فوق تحت إلي آخر الشارع عالبحر
يم مبنى وزارة النفط
بعدين أول لفة يمين في لافتة
:)

OutOfReach ...
Thanks :)

Mishari ...
إي ترا ما يتطوف :)

Anonymous said...

Hey people, I just registered on this splendid community and wanted to say hi there! Have a wonderful day!

Anonymous said...

Hi people

I am new here and I just wanted to say hi!

See you