Wednesday, September 17, 2008

الشيطان قص علي !

-----
هذا الموضوع كتبته في رمضان سنة 2005
أي قبل 3 سنوات!
حبيت أذكركم فيه وأذكر نفسي قبلكم
-----
في البداية ... شهر رمضان الفضيل لا ينتهي الكلام عنه …
كنت أنوي نقل موضوع لكم من كتاب أو أن أكتب موضوعا بأسلوبي ولكن باللغة العربية …
لكن أفضل اليوم أن أكتب بلهجتنا الكويتية وأسولف معاكم وأشوف اشيطلع معاي
لأن الصراحة مافي نقطة معينة ببالي
بسم الله نبتدي
شهر رمضان نعمة من نعم الله سبحانه وتعالى علينا
فيه تتضاعف الحسنات وتصفد الشياطين!
يعني ماكو شيطان!!
شهر كامل كل سنة الشيطان يكون فيه محبوس !
شنو معناته هالشي؟
إن أي واحد فينا يغلط أو يرتكب معصية أو يترك عبادة في رمضان فهذا الشي من نفسه!
أهو أمر نفسه اتسوي هالشي ...
ما ينفع يقول: الشيطان قص علي!
لأن الشيطان ما يقدر يوسوس لنا بهالشهر
فالواحد فينا إذا عصا الله تعالى لازم يلوم نفسه ...
وهذي فرصة إن الواحد ايعرف نسبة الخير والشر إلي فيه ...
وإذا كنت أسوي غلط قبل رمضان واستمريت بهالغلط برمضان
فمعناته إن الخلل فيني آنا !لأن الشيطان سواء كان موجود أو مو موجود آنا قاعدة أغلط هالغلطة ...
صحيح إن شعور يعور لما أكتشف هالخلل إلي فيني بس فرصة ما تتكرر وايد
إني أعرف نفسي اشكثر أمارة بالسوء؟
أحاسب نفسي بهالثلاثين يوم وأحاول أتغير ...
وأهم شي إني أندم على إلي سويته في سنوات عمري إلي طافت ...
وأنوي فعلا إني أتوب ... وأدعي الله سبحانه وتعالى إن يغفر لي
ويعينني على الطاعات وترك المعاصي
مابي أطول عليكم ... بس عندي طلب صغير ...ممكن؟
أبي كل واحد فيكم يقعد اليوم بروحه بالليل متأخر ...
يقعد على سيادة الصلاة ... ويتذكر اشكثر غلط بحياته
وشنو الشغلات إلي سواها ... ويدعي ربه إن يغفر له كل ذنوبه بهالليلة ...
ويبين لله سبحانه وتعالى اشكثر ندمان ...
وترى (الدموع) تغسل القلب واترققه ...
قال رسول الله صلى الله عليه وآله وسلم : عينان لا تمسهما النار
عين بكت من خشية الله ، وعين باتت تحرس في سبيل الله
-----

12 comments:

malak said...

يعطيج العافيه اختي عالموضوع الحلو

و فعلا هاذا افضل شهر بالسنه المفروض نستغله صح


:)

3bady said...

بدعتي اصفق لج

معاج حق بكل كلمة

كلمة اشتغفر الله مو صعبة لو الواحد يرددها طول الوقت :)

يعطيج العافية اختي

Unknown said...

يوعان هذا اول شى
ثاني الشيطان ما يقص على احنا اللى نقص علي نفسنا ونقطها براسه بهالشهر
صح والا انا يوعان؟

Ra-1 said...

malak ...
الله يعافيج وحياج الله :)

3bady ...
الله يعافيك :)

Mishari ...
صح
وانا يوعانة أكثر منك ولي الحين دوامي ما خلص
:(

Aurous said...

اي والله صج احباط لمن اكتشف ان نفسي اهي الي تأمرني بالسوء.. شكله ابليس ما يعب معاي وايد :p

الله يقدرنا على تغيير انفسنا للأحسن ^_^

Big Pearls said...

allah yekafena shar iblees

ناصر الكويت said...

في ناس تقص على الشيطان

Eb9ara7a and his Wife said...

واخيرا قدرنا ندش عالمدونة:) بس اتوقع لفترة محدودة وبعدها بننحرم من المواضيع الحلوة
بالمستشفى المدونه غير محجوبه

الله يصفد شياطين الإنس معاهم

Catism القطويّة said...

آه من هذه النفس، آه.
جزاكِ الله كل خير :)

الطارق said...

الله يجزاج خير على هالتذكير ، يقول الله تعالى عن الشيطان : ( وما كان لي عليكم من سلطان إلا أن دعوتكم فاستجبتم لي ) محد طق احد على ايده فكل واحد منا عليه تحمل مسؤوليته فكل نفس بما كسبت رهينه .


ما قصرتي

Ra-1 said...

Aurous ...
Big Pearls ...

آمين :)


ناصر الكويت ...
:)

Ra-1 said...

Eb9ara7a and His Wife ...
لما كنت عندكم ما كان في انترنت بالمستشفى !!
بس زين مو محجوبة لأن من بيتكم ما كنت أقدر أدش

Catism القطوية ...
أجمعين :)

الطارق ...
شكرا على الإضافة :)