Thursday, February 12, 2009

ترا الخدم بشر !



حدددي يوعانة


Abeee :'(


-----


ما قلت لكم السالفة إلي في مطار دبي !!!


وصلت المطار وعند كاونتر إجراءات السفر وأخذ الحقائب


لاحظت امرأة تبدو هندية تتكلم مع الموظفين ولايفهمونها


وهم يشرحون لها ولا يعرفون اللغة العربية!


ذهبت لهم واستفسرت عن المشكلة


I speak Arabic, what is wrong?


شرح لي موظفين الطيران أن هذه السيدة قد فاتتها الرحلة


آنا توهقت وتمنيت إني مو ساءلتهم


حرام شلون بقول لها إن الطيارة طارت عنها :(


سألتهم والحل؟


دلوني مكان مكتبهم وإن لازم تروح تدور تذكرة على أقرب رحلة


-----


اطلعت المره من سيريلانكا وتتكلم عربي مكسر


قلت لها إن الطيارة طارت ورحت معاها دليتها مكتب الطيران


وصلنا ولا يقولون أقرب رحلة بعد 9 ساعات بس ماكو مكان


والرحلة إلي بعدها بعد يومين


جان أقول لها إن لازم تروح البيت وترجع يوم الأحد


جان تبجي


وتقول مابي أرجع !!!!


آنا استغربت @@


قلت لها : جم رقم تلفون الي تشتغلين عندهم؟


قالت : ماعرف !!!


خذيت أوراقها قعدت أدور


لقيت رقم


اتصلت


جان تطلع لي وحدة شرية

!!!

-----


خدامتكم طارت عنها الطيارة لأنكم يبتوها متأخر


إي وشنسوي لها؟


شنو شنسوي لها؟ تعالوا اخذوها وييبوها يوم الأحد


خل تقعد هناك


تقعد بالمطار يومين؟؟؟


إي كيفها ! عادي


لا مو عادي! وحدة تقعد بالمطار على الكرسي يومين!


اففف خلاص انتوا ييبوها


هاهها ! آنا أصلا مالي شغل آنا كويتيية وبسافر الحين اتصلت بساعدها


انتوا يبتوها تعالوا اخذوها


مو احنا يبناها


عيل منو يابها؟؟؟


الباكستاني


والباكستاني وينه؟


ما دري


-----


وانا أكلمها قامت السيلانية تبجي! وتقولي مابي أرجع !!!!


-----


والمره الملسونة على الجانب الآخر من الهاتف تصرخ


خلاص خل تقعد بالمطار ماراح ناخذها


ما تخافين من الله؟ شلون يعني تنام بالمطار


-----


اقعدت تقول كلام مو مفهوم وصكته


الحمدلله الذي عافانا مادري شلون ناس جذي قليلين أدب


-----


كلمت السيلانية جان أقول لها : منو الباكستاني؟


جان تقول تاكسي


مطرشينج المطار بتاكسي من راس الخيمة؟؟؟


إي ساعتين الطريج


@@


وليش تبجين؟


آنا مابي يروح هذي ماما مو زين


كله صرخ كله طقي آنا


واقعدت توريني وين طقتها وشلون


وانا منصدمة !!!!


ليش تطقج؟؟؟


مادري


-----


مبين من كلامها بالتلفون وصوتها وأسلوبها إنها مريضة أعوذ بالله


:/


-----


آنا أصلا ماراح أخليج ترجعين لها !


اشكثر صارلج عندهم؟


ثمان أشهر


انزين شفتي الكرسي إلي أهني؟ قعدي وشوفي الساعة هذي


إذا صارت 10 تعالي هالمكتب يمكن يحصلون لج كرسي على طيارة الليل


آنا كلمتهم وحرصتهم يدورون لها وفهمتهم وضعها


وإذا ما حصلوا تنطرين يوم الأحد بعد شنسوي


:(


الحين روحي غسلي واشتري لج أكل


ولا تخافين


عندج فلوس؟


لا ما عندي كل فلوسي إلي يمعتهم شريت فيهم التذكرة


انتي شريتي التذكرة ؟؟؟


إي آنا مابي أقعد عندهم خايفة :(


-----


عورت قلبي كل شوي تقول مابي أرجع خايفة وتبجي


صج في ناس ماكو إحساس


مسكينة إلي طلع حظها عند ناس جذي


عطيتها فلوس وجيس كاكاو كان معاي


جان تروح تقعد


مشيت جان أرجع لها وأعطيها مصحف


لو تشوفون تعابير وييها !


نفس الفرحة إلي شفتها على وجوه الصينيين المسلمين بالصين لما نعطيهم قرآن


حسيتها مو مصدقة وتسألني : هذا حقي؟؟؟


شعور غريب


شلون هالمره المسكينة المسلمة


هدت أهلها وديرتها وكل شي ويت حق الغربة


عشان تشتغل وتخدم ناس والفلوس إلي تحصلهم مو حقها

حق أمها الكبيرة وإخوانها الصغار وعيالها عشان يقدرون يعيشون


يت بلد عربي ومسلم واهيه فرحانة


وانصدمت بالعايلة إلي استقبلوها بالسب والطق والمعاملة السيئة


وما فكروا إن اهيه أمانة عندهم


ولا خافوا من عقاب الله سبحانه وتعالى


ولا تأثر قلبهم لما شافوها تبجي وتترجاهم


-----


خليتها ورحت ألحق على طيارتي ودمعتي على خدي


أدعي الله سبحانه وتعالى إنها تكون حصلت كرسي على رحلة الساعة 3 الفير


وأتمنى إنها تغير الفكرة السيئة إلي خذتها عنا بسبب عايلة متوحشة عاملوها مثل الحيوانات


حتى الحيوانات نعطف عليهم ونحافظ عليهم !!!


سبحان الله


-----


ركبت الطيارة وانا ما عندي شي أقوله غير


لاحول ولا قوة إلا بالله


-----

آنا ما كنت أصدق إن في شغلات جذي تصير لما شفت بعيني

-----

يقول النبي صلى الله عليه وسلم

إخوانـُكم جعلهـُمُ الله تحْت أيْديكم فأطعـِموهم ممّا تـُطعمون وألبسوهم مما تلبـِسون

وكلِّـفوهم بما يطيقون فإن كلّـفتموهم بما لا يطيقون فأعينوهم

50 comments:

Mr-Mohd said...

والله شقولج الموضوع جدا انساني ويكدر الخاطر ويشرح حالة وحده بس من حالات انتهاكات حقوق الانسان الموجوده في مجتمعاتنا الاسلامية او اقدر اقول الجاهلية لانه الاسلام بريء من ممارسات بعض الاسر


بصراحه مبادرتج وايد طيبه وعفيه عليج هذا فعلا في ميزان حسناتج انتي خففتي عليها والحين اكيد بتعرف انه الناس اجناس والتربية تلعب دور كبير في هالمجال


اختي انتي ذكرتي حاله وما خفي اعظم

ودائما انا اضع هذا المبدأ في رأسي

عامل الناس - كل الناس باختلاف اجناسهم والوانهم ومعتقداتهم كما تحب ان يعاملوك .

Anonymous said...

هذا العرب ومايسوون

لا دين ولا دنيا

و انا ككويتي ماحس إنه نحن مجتمع اسلامي ولا الدول المجاورة لنا

الناس كل مالها وتفسق زيادة

و اعتقد هذا من علامات آخر الزمان كثرة الظلم والفسق

الله يرحمنا برحمته

بانوراما said...

لا أقول سوى

لا حول ولا قوة إلا بالله

أين ذهبت تعاليم الأسلام

أين ذهبت لا فضل لعربي على أعجمي

أين ذهبت العدالة وعدم الظلم

Blogger said...

واااي القصه وااايد عورت قلبي!!
حرام والله!!
من جذي نشوف قصص جرايم الخدم في البيوت
يمكن لانهم يشوفون الويل من معازيبهم

بس ترا هم بعض الخدم جذابين
ومهما عاملتيهم زين ما يبين في عينهم
مثل اللي كانت عندي


تدرين ان انا الحين صارلي اكثر من 4 اشهر بدون خدامه

((استغفر الله لا تذكريني فيها))

بس للاسف الواحد تعود انه ما يقدر يعيش بدونهم

وللاسف خضعت واضطريت اطلب ثانيه

Salah said...

جزاج الله خير على هالاحساس الانساني الطيب

----

مو قلنالكم الخدم مظلومين!

الله يعينهم

Nemo said...

lel asaf mafi human rights wla labor rights 3endna ... fe mashro3 labor low 7g hal msaken bs m7ad mhtam y6abqah

el makatab ya'7thon mnhom 1000 kd bs 3ashan eyoon el kuwait o hatha etha kan fe she'3el 9ej

wallah allah ra7 ya'7sef fena ;(

7aram wallah

L.R.643 said...

wala jad thag khilgy 3alaiha o 3asa allah iyasir darb.ha inshala o yarzigha ilkhair... ya36ech alf 3afya, kan bi2imkanich inich matsa3denha wala tis2ileen 3nha, bs allah sakharlich laha o inshala a3malich kilha liwajh illah.. ibmezan 7asanatich yarab :)

Hasan.B said...

We do not even have decent laws that can protect them. Shame on us.

joe said...

لا حول ولاقوة انا لله
عاد صج انا وااحد بتكلم بكل شافيه
نلاحظ بالدول العربيه انه يعاملون العاملين جنهم حيوانات ماكو رحمه
وسااعات الواحد يستغرب قاعد والماي صوبه يطرش الخدامه يقولها صبيلي مااي صج الواحد تبط جبده

وسالفتج تعوور القللب

منطلقة بطموحي said...

جزاك الله كل خير اختي روان

موضوع رائع و إنساني من قلب والله

حسبي الله و نعم الوكيل

ناس ما تخاف الله !!!!!

QiYaDiYa said...

عورت قلبي مسكينة ="(
الله يعينها ..


و الي يقولج
مرة من المرات بحديقة الشعب
ياهل بالابتدائي
انكسرت ريوله و اهو يلعب
ادق على امه اقولها تعالي اخذي ولدج
تقولي الخدامة عنده و السايق برة خل يودونه الطبيب
قلت لها يبجي يبيج
تقول انا طالعةالحين
بعدين اروح له !!

الناس انعدمت بقلوبهم الرحمة !!
يا ربي لا تبلينا ..

TruTh said...

لاحول و لا قوة الا بالله

قسما بالله ذوبت قلبي هالخادمة المسكينة،ليش تطقها؟ شنوا كل هالكم من العدوانية و القسوة؟

حسبي الله و نعم الوكيل على معزبتها و على كل انسان يظلم الخدم و يعذبهم

في ميزان حسناتج ان شاء الله مساعدتج لها و يعطيج الف عافية على البوست اللي عور قلوبنا

باغي الشهادة said...

الله يآجرك على فعلتك

Razz said...

هذي عقابهايوم القيامة

لا حول و لا قوة إلا بالله

ان شاء الله كل مظلوم ياخذ حقه

L.R.643 said...

actually mu mit'akda mn ma3lomaty bs i think there is a minimum wage law for housekeepers of a certain nationality (atwaqa3 Philippines), and there are sum rules and regulations regarding iqamat.hum wama ila thalik, bs ilmushkila mu bilqawaneen... bilmu3amala dakhil ilmanzil.. o like q8cool said, itarbiya til3ab dowr kber!

Manal said...

السلام عليكم وصباح الخير يا كل الاحساس والطيبة
:)

الله يحفظكِ حبيبتي ويجزاكِ خير

الحمد لله
الدنيا فيها لالخير الى الآن
وان شاء الله دوم

انا وحدة رافعة شعار لا للخدم

لكن ما عندي مانع ادفع على العمالة تبع الشركات للتنظيف يوم او يومين بالاسبوع وادفع على الساعة لو يوصل المبلغ 30 دينار

الظلم موجود بين الناس
ومن الناس منهم اصحاب مال
ومنهم خدم
كلهم بشر
وكلهم ذا احساس ومشاعر

منهم الزين ومنهم الشين

على العموم
انا ماراح اطول
والموضوع يمكن الكلام فيه من نواحي كثيرة
لكن وقفة مشرفة لك حبيبتي والله يجزاك عليها كل الخير

دمتي بخير حبيبتي
:)

NewQ8 Bride said...

واي بعد قلبي تكسر الخاطر

استغفر الله في ناس ما يحسون

يزاج الله خير و الله ما قصرتي

Take Off life‘ said...

لاحول ولا قوة الا بالله!
شنقول بعد, الله يرحمها برحمته ويفرج عليها, وحسبي الله على من ضلمها

الله يكثر من امثالج :)

Yara said...

Qe9a t3awer el galb... lel asaf ako nas chethi, walla 7aram... Allah yejzaach alf khair 3ali sawaiteeh walla.. mskeena ;/

Ana knt fe dubai, ams reja3t :)

الحارث بن همّام said...

عندنا نظام في البيت للتعامل مع الخدم معمم على جميع افراد الاسرة

أحد بنوده هو
please & thank u

soor said...

لاحول ولا قوة إلا بالله ..
ربنا لا تؤاخذنا بما فعل السفهاء منا ..
جزاج الله خير أختي وعسى عملج في ميزان حسناتج ان شاء الله ..

جديد المدونة :
" ٥*٤ =٣سنوات !! معادلة كويتية"
alsoorst.blogspot.com

Hitman1 said...

wallah sad story... I can't believe that people this cruel exist in this world.

Anonymous said...

بس بعضهم يناااااانوه مقعدين
سحر ويطقون اليهال وبلاوي بلاوي

بالنسبه لي بصراحه مامرت علي خدامه زينه بس هذا لايعني ان نعاملهم معامله سيئه بالعكككككس

-mate said...

ohma msakyeen,

Entay 6aybaa,

Ana yaw3an akthar minich!

مستعدة said...

ما شاء الله .. عسى الله يآجرج على هذا التصرف :)..

وعسى الله يهدي هالناس اللي مو خايفة ربها بهالأمانة اللي عندها..

تخيلي أنا ساعات أقوم من النوم على صراخ جارتنا على الشغالة ;'/
تكون ناطرتها بالسيارة وتقعد تصرخ ويبقى أحد بالفريج ما سمعها..

شكرا على الموضوع :)

lawyer said...

حمدلله على سلامتج


في حديث عن الرسول عليه الصلاه و السلام عن السعي وراء قضاء حاجه المسلمين

الله ياجرج و يرزقج خير هالعمل
و يحفظج




اثر فيني البوست وايد

و يوعتيني ابي ماك

Anonymous said...

و الله دمعت عيوني!!!!

أنا ضد مبدأ الخدم لأن الناس وحووووووش و لأنه الواحد لازم يعامل خدمه مثل عياله و نفسه... لازم ياكلون من أكلنا و يلبسون من لبسنا اذا نبي انييبهم و انكرف عليهم 24 ساعة بلا رحمة لأنهم مو عبيد و لا جواري شريناهم!!!!

الناس عبالها انه هذوله أقل من الحيوانات، و ان قلتيلهم حرام قالوا لالالالا اشدعوه عاد بديرتهم ياكلون و لا ينامون على فرش؟!؟!؟!؟!

يا سلام! لأنهم فقارة و متسضعفين في الأرض عادي نلعب فيهم مو؟؟؟؟

انا ماكو شيء يعور قلبي في الكويت كثر الخدم

و الله جزاك الله خير على انك رحمت هالمسكينة الفقيرة... مادري الحين راحت ديرتها و لا نطرت يومين؟؟؟ يومييييين ياللي ما تخافون ربكم يومين بالمطار؟!؟!؟!؟

بعدين يقولك لا المسيحيين مو زينين مو خوش أوادم

أنا أعرف واحد مسيحي سويسري، الخدامة تقعد وياهم على الغدا، دارها دار رسمي بين دورهم و أحلى من داري في بيت أبوي بعد... و قاعدة عندهم 15 سنة ما ترضى حتى ترجع ديرتها (سيلان)

in6elakah said...

الله يكون بالعون
قبل كانوا يشوفون اهل الخليج والعبر كأنهم احفاد الرسول صلى الله عليه وسلم والحين من كثروا ما كلوا منا ماعاد يشوفونا شئ

الله المستعان

Anonymous said...

لاحول ولاقوة الا بالله

Eng Q8i said...

والله حرقتي قلبي
هالناس ويين عايشين
ماعندهم قلب ولا رحمة

انتو متخيلين ومعاشها كله على التذكره!!!؟


الله يكون بعون الخادمة

Ra-1 said...

q8cool ...

بالضبط الإسلام بريء منهم لأن تعاليمه عكس هالتصرفات !

جان زين كل واحد يعامل الناس مثل ما يبيهم يعاملونه
ويفكر قبل أي كلمة أو فعل ويسأل نفسه
هل في هذا ظلم؟ إساءة؟ جرح؟ احتقار؟



KarKoor ...

كلامك صحيح بس في ناس وايد مازالت فطرتهم سليمة وتصرفاتهم سوية ولله الحمد

آمين

Ra-1 said...

بانوراما ...

الغريب شلون ما يفكرون إن وراهم عقاب؟
ما يخافون من عقاب الدنيا قبل الآخرة؟
ما يدرون إن دعاء المظلوم مستجاب؟

سبحان الله :/



weeknds ...

بكل مجتمع وكل ديرة في الزين والشين

وبعدين صدقيني نقدر نعيش من غيرهم!

:)

Ra-1 said...

Salah ...

يعجبني شعار زوجتك وقانونها
لا للخدم
وأأيدها بشدة :)



Nemo ...

يكسرون الخاطر :(
الله يكون في عونهم

Ra-1 said...

L.R.643 ...

آمين
:)



Hasan.B ...

حتى لو كان في قوانين
تتوقع بيطبقونها؟

Ra-1 said...

{~المباركية~} ...

تصدق أستحي أطلب من خادمتنا شي؟
مع إنها عندنا من كان عمري 3 سنين !



منطلقة بطموحي ...

الله يهديهم ويهدينا

Ra-1 said...

QiYaDiYa ...

إذا الأم مافيها رحمة على ولدها شنو تتوقعين !

الله يكافينا الشر ويحفظنا
:/



TruTh ...

الله يعافيج
:)

Ra-1 said...

باغي الشهادة ...

أجمعين



On-The-Rocks ...

مرات العقاب يكون بالدنيا قبل الآخرة

آمين

Ra-1 said...

L.R.643 ...

التربية إهيه الأساس



Manal ...

وعليكم السلام :)

حبيت شعارج
وأتمنى ما يأثر عليج أحد وتغيرينه
:p

وإن شاءالله راح أقلدج
وانا من زمان حاطة ببالي هالشي إن لا للخدم
:)

Ra-1 said...

New Bride ...

أجمعين



Take Off life‘ ...

آمين

:)

Ra-1 said...

Yara ...

Welcome back :)



الحارث بن همّام ...

شكله في بنود وايد :)

Ra-1 said...

soor ...

إن شاءالله نزور مدونتكم
:)



Hitham ...

It is scary :(

Ra-1 said...

Anonymous ...

في جانب إيجابي وجانب سلبي الواحد لازم يوازن ويعرف شلون يتصرف معاهم وبنفس الوقت ياخذ الحذر



-mate ...

Hehhe :)

Ra-1 said...

مستعدة ...

لا حول ولا قوة إلا بالله



lawyer ...

الله يسلمج :)

Ra-1 said...

danderma ...

آمين

في ناس وايد يعاملون خدمهم باحترام وبعدين الخدم ضعفاء يعني باب أجر كبير مفتوح المفروض نستغله



in6elakah ...

آمين

Ra-1 said...

Anonymous ...

فعلا هذي الكلمة إلي أقولها لما أشوف أحداث جذي



كويتي صريح ...

ماكو قلب ولا إحساس

آمين

Anonymous said...

Hate it when it happens. I just make sure nothing close to that happens in the place i live.

Stay positive, things will change ;)

Anonymous said...

أختي بارك الله فيكي على إحساسك المرهف مع الأخت المسكينة التي وقعت بين أناس لا يخافون الله .. ألا يعلمون ان إمرأة من بني إسرايل دخلت النار في هرة لم تحسن معاملاتها
فليتقوا الله بهؤلاء المسلمين
وبارك الله فيكي
فلسطيني

Ra-1 said...

Abdullah ...

Welcome to my blog :)



Anonymous فلسطيني ...

أجمعين

Anonymous said...

خدمكم خولكم ..

Anonymous said...

هذا بالإمارات ، عيل تعالو بالكويت وتطمشو على اللي شفتهم بالجنائية ، لو تعرفون القضايا الموجودة جان عرفتاو أنه أحنا عايشين في غابة مو أوادم اللي أهني

Hasan.B the problem is not with the law, it's the people "hailag"