Monday, May 31, 2010

Please be there!

أقل شي ممكن نسويه لنعلن عن غضبنا وتضامننا مع أسطول الحرية
والوفد الكويتي المحتجز من قبل إسرائيل
"اعتصام ساحة الإرادة اليوم الساعة 6:30"

Protest against israel's attack
"Today at 6:30 in front of the National Assembly"
It is the least we can do 

Saturday, May 29, 2010

The Haunted Mansion (Part 2)

تكملة لموضوعي السابق والصور تتكلم  :)


تصدقون لقينا اصنصير
وبالطابق الثاني باب الأصنصير وردي

الظاهر إن جناح بنات لأن حتى الحمام وردي !

-----

And we found a swimming pool :D
وماشاءالله الي مشخطبين وكاتبين أساميهم واصلين لي داخل حوض السباحة

وهذ كتابات من داخل القصر
وبدون مبالغة ماكو مساحة فاظية مو كاتبين عليها !!!
يعني أعتقد ثلاث أرباع شباب الكويت داشين وكاتبين ذكرى

-----
طبعا آنا قلت حسافة أطلع وموكاتبة ذكرى
قعدت أدور مساحة فاظية ولما لقيت
ماكان معاي قلم أو لون
وسألت الي معاي محد عنده :(
قعدت أفكر وأدور جان آخذ صخرة
وأحفر فيها الطوفة
كان عمود مو طوفة لأن الطوف متروسين كتابات


وصرت أول بنت تكتب اسمها بالقصر المهجور
وناسة  ;)

Friday, May 21, 2010

My dream came true :)

 I entered the Haunted Mansion in Mishref!
Yes I did and I still cant believe it :D
-----
مثل أي طفل وطفلة عاشوا في مشرف وكل يوم في طلعتهم ودخلتهم للمنطقة
 يمرون على القصر المهجور
ويفكرون ويتخيلون شنو ممكن يكون داخل هالمكان العملاق
-----
وفي الابتدائي والمتوسط بديت أسمع قصص من البنات عن القصر
الي اخوها وربعه شحقوا السور 
والي سمعت قصص من اختها الكبيرة عن ناس ادخلوا وشافوا شغلات غريبة
وسمعوا أصوات مخيفة
وكنا نتيمع في آخر الصف بحصة الاحتياط ونندمج بالقصص من البنات
قد لا تكون قصص حقيقية ولكن مخيفة
خصوصا لما يقولون الي يدش قصر الأشباح ما يقدر يطلع !!
ومازلت أتذكر قصة من وحدة من البنات الي كنا نتجمع حولها وتقول لنا شغلات ما سمعنا عنها من قبل
تقول إن واحد من الشباب الي دخلوا القصر لحقته جنية في الشارع الفاصل بين قطعة خمسة وستة
والجنية مازالت بهالشارع وصار هالشارع بالنسبة لنا مخيف هههه 
-----
قبل أمس تحقق حلمي ودخلت القصر
ولكن بشكل قانوني يعني ما شحقت الطوفة :)
مركز التصوير بالنادي العلمي أخذ تصريح للدخول وفتحوا لنا الباب الخارجي
دخلنا في مجموعة من السيارات ومشينا مسافة إلي أن وصلنا للمباني
وهذي صورة للمبني الرئيسي قبل دخوله
"ضغطوا على الصور لتكبيرها"


شكله صغير بس من داخل كبير جدا ضعنا داخله !
قبل الدخول كان المكان هادي وما نسمع ولا حس كأننا في صحراء خالية
-----
قرينا المعوذات والأدعية ودخلنا القصر ...

المنظر هذا ذكرني بالكويت بعد التحرير مباشرة
-----
yes we walked on these stairs!
-----
"نظرة من النافذة للعالم الجديد"
وبالصورة خزان الماء القديم داخل أسوار القصر
-----
"الطريق للمجهول"
الغرفة في النهاية مظلمة جدا
-----
My excited friends :)
Three of us living in Mishref all our lives
اهمه كانوا بالدور الثاني وانا بالثالث
وأطل عليهم من خلال السقف المتكسر !
-----
" الطريق إلي النهاية ! "
صورة من الدور الثالث
وتقريبا نصه سطح وفي غرف شوية
وفي أماكن وايد تساعد على الانتحار مثل الباب بالصورة :p
-----
ترقبوا الجزء الثاني من الموضوع
مع مزيد من الصور والمفاجآت ;)

Tuesday, May 11, 2010

2010

كلمات باللهجة العامية كتبتها ليلة البارحة في دفتر مذكراتي 
أنقلها الآن لمدونتي ودفتر مذكراتي العام
-----

لما أفتح دفتر مذكراتي وأمسك القلم وأطالع الورقة فترة
وبالنهاية أصك الدفتر من غير ما أكتب ولا حرف
ويتكرر هالشي لأكثر من يوم
هذا معناته إن من كثر الأحداث الي قاعدة تصير بحياتي مو عارفة أدونها
أو مو فاهمة أكتبها أو مابي أحتفظ فيها وأتذكرها !!
أو يمكن مجرد إن بالي مشغول جدا لدرجة إن مو قادر يترجم إلي فيه إلى كلمات مكتوبة !!!

-----

قبل كل شي ... اشتقت لبلوقي "مدونتي" وأحس إن
سنة 2010 إلي كنت ولا زلت متفاءلة فيها سريعة جدا من بدايتها
وها قد قربت علي منتصفها وتمشي الأيام بتتابع من غير ما أشعر
هل تشعرون بنفس الشي أيضا؟ ولا بس آنا ؟؟

-----

لي الحين ما كتبت عن سفرتي الطويلة إلي كانت في شهر فبراير
ولا كتبت عن معرضي إلي كان ضمن معرض كويتي وأفتخر
ولا عن الأسبوع إلي صرت فيه الأم والأبو  لعيال خالي
ولا حطيت صور لهذه الأحداث كلها
والصور موجودة ;)

-----

اليوم أخيرا كتبت شي
قصدي الليلة
الساعة الآن 2:45 بعد منتصف الليل
والبيت هادي كلهم نايمين وتعبانين بعد الحفلة


كتبته قبل سنة
وقبل شوي كانت حفلة ملجته
الحمدلله رب العالمين :D
الله يوفقهم ويسعدهم

استانسنا وايد بالحفلة
بس مع الزحمة ما مداني أسلم عليه ولا أصور معاهم 
والحمدلله لحقته بعد الحفلة للحوش وكان طالع بينطر زوجته بالسيارة
وبسته ولمني وصادف إن المصورة بره وخذت لنا صورة مع بعض للذكري 
مابي أتذكر وأبجي الحين ههه :')
أهوه يصير أصغر خوالي وصديقي
والصدفة الحلوة إن بنفس الشهر تزوجت أيضا صديقتي السعودية
أحبها وايد من كنا صغار
والصدفة الأحلي إنها تزوجت كويتي !
يعني ماراح أضطر أسافر الخبر عشان أشوفها كل مرة
:) 

-----

عندي وايد سوالف ودي أكتبهم بس من التعب أحس إني بنام بأي لحظة الحين
حان وقت إغلاق الأبجورة ...  

Wednesday, May 05, 2010

Dear blog, I miss you so much!