Thursday, October 21, 2010

الحمدلله رب العالمين

ومر شهر على كتابتي لآخر موضوع

وبهالشهر تغيرت أشياء وايد

ما أقول تغيرت لأن حياتي نفسها بس انضافت لها أشياء ييديدة

ليش الناس تسمي الزواج صفحة جديدة؟ وحياة جديدة؟؟

وليش الناس يتغيرون بعد الزواج؟

وليش يمسحون شغلات وايد من حياتهم؟ شغلات كانت جزء من يومياتهم؟

اهتمامات هوايات صداقات طقوس يومية معينة ... إلخ !

المفروض إن الزوج وعايلته والالتزامات الجديدة تنضاف لبرنامج الشخص وينظم جدوله وأولوياته بس ما يلغي إلي كان موجود قبل

ولا يلغي شخصيته ولا خططه ولا أهدافه وأحلامه

وهذا هو الصح

-----

خلال الثلاثين يوم إلي طافوا كان عرسي

كنت أحلم بعرس صغير بالبيت

ولكن صار العكس لأن الوالدة الله يحفظها تبي تعزم كل إلي تعرفهم :p

كانت حفلة كبيرة بفندق بس كانت أجمل من إلي كنت أحلم فيه ولله الحمد

كل شي كان حلو والكل كان مستانس

كان ودي لو كنت أقدر أمسك كامرتي وأصور ههه

وطبعا كان في حضور من البنات إلي تعرفت عليهم في عالم المدونات

وأيضا صديقاتي من مصر والهند وباكستان وغيرهم

:)

-----

أشكر من كل قلبي أبوي حبي الأول وأمي الغالية وإخواني وخواتي

وأهلي وصديقاتي خصوصا البرايد ميدز

أحبكم وايد والله يخليكم لي

-----

طرنا بعدها إلى بيت الله الحرام

اقتراح زوجي كان تأدية العمرة في البداية

وكان أحلى قرار وأسأل الله سبحانه وتعالى أن يتقبل منا

-----

بعدها اتجهنا لتايلند

تايلند ما كانت بالخطة أبدا

طول عمري أبي أروح إيطاليا بشهر العسل مثل أمي وأبوي

بس صادف إن موسم أمطار فأجلناها

وقلنا نختار بلد في شرق آسيا لأننا من عشاق هالدول

طبعا الصين ما تصلح والصدفة إن اثنينا زايرينها خلال هالسنة :)

فاحترنا بين بالي وتايلند حتى استقرينا على تايلند

-----

جزيرة بوكيت ومدينة بانكوك يحتاجون موضوع لهم

فيهم أماكن وايد حلوة أنصح بزيارتها

راح أتكلم عنهم مع الصور في وقت قريب إن شاءالله

-----

رجعت الكويت ولقيت أخوي مع زوجته منتقلين لندن للشغل !

وأخوي الثاني لي الحين مارجع أستراليا يعني عندي وقت أستانس معاهم الحمدلله

:D

-----

اليوم أول يوم دوام بعد إجازة الـ 15 يوم إلي سمحوا لي فيهم وكانوا من غير راتب بعد

وأمس كان إضراب للعمالة إلي يسوون الجاي @@

حسافة طافني ما شفت شصار :)

-----

إي نسيت! قبل عرسي بيومين كنت طالعة ورجعت البيت شفت سيارات غريبة ماعرفهم

دشيت جان ألقى كل بنات خالاتي! مسوين لي حفلة مفاجأة

لتوديع العزوبية ههه :)

يايبين أكل وكيك وهدايا عجيبين ولعبنا مسابقات وكان في عرض فلم عني

صور آنا عمري ما شفتهم مادري من وين يايبينهم

واقعدوا عندي إلى الساعة 1 بالليل

كان يوم وايد حلو ماراح أنساه

-----

أمبيه كتبت وايد

خلاص أتمنى لكم إجازة نهاية أسبوع جميلة

مع الجو الجميل

6 comments:

Seema* said...

أنا اقرا وابتسامة عريضة على ويهي ;p
الحمدلله الذي بنعمته تتم الصالحات :)
عليكم بألف عافية والله يخليكم لبعض :)

esTeKaNa said...

اللهم لك الحمد حتى ترضى
:)
تسمي الناس الزواج حياة جديدة لأن كم المسؤوليات والأولويات والاشخاص تتغير
!!
هذا ما يعني ان الانسان يلغي نفسه وحياته السابقة،ولكن مجرد ترتيب اولويات واشخاص
:))
انا جدا سعيده وانا اقرا هذا البوست
الله يوفقج ويسعدج ويكون قرة عين لج ولا يحرمج من كل حبايب قلبج يا عروسة
:**

رورو الشخبوطه said...

مبروك ..

والله يوفقكم ويهنيكم يارب..

Anonymous said...

زين سمعنا اخبارج الله يهنيج انا دائما من المتابعين لبلوقج :)

شاي الضحى said...

الله يهنيكم يارب

ويخليكم لبعض

صح كلامج بعد الزواج تتغير وايد اشياء وتصير عندج التزامات ومسئوليات وتحسين انج بيوم وليله صرتي كبيره

شعور غريب ما اقدر اوصفه

بس الزواج حلو خاصه انه استقرار

:)

Antonio said...

الف مبروك ان شاء الله

وعقبال ما نشوف العيال يكتبون في

المدونات

:)

الف مبروك