إشفيهم على أغراضي ؟؟؟

الإجازة كانت عجيبة والحمدلله وايد استانست بالسفرة

ما مداني أنزل الصور بس إن شاءالله قريبا جدا

-----

أول يومين قعدنا بمنتجع

صرت سمرة :)

بس يوم رجعنا من السفر وأمي شافتني عصبت

أمي ماشاءالله وايد بيضة وتحب البياض

كله تقول الناس يبيضون روحهم وانتي تسمرين روحج !!!

آنا ماحب البياض كلش :/

-----

تذكرون سالفة تلفوني والأرقام العجيبة والغريبة؟

في رقم يدق يدق يدق

حقرته بس لما طول جم يوم قلت الظاهر أحد أعرفه

بما إن أرقامي ضاعوا لما اخترب تلفوني

رديت جان يطلع لي واحد

إختي ممكن آخذ من وقتج شوية؟

منو معاي !؟؟؟

محمد

أي محمد؟

مو مهم ! انتي أصلا ما تعرفيني

وتبي منو ؟

شوفي آنا عندي لج عرض

شنو؟

بشتري خطج

خطي مو للبيع !!!

ميخالف بيعيه !

مابي أبيعه

ليش؟

هذا رقمي من زمان وكل إلي يعرفوني عندهم إياه

وبعدين الرقم مو حلو ! ليش تبيه؟

أهوه نفس رقمي الثاني بس آخر رقم غير

مابي أبيعه ! مع السلامة

عموما فكري واذا غيرتي رايج عندج رقمي

!!!

-----

الحين آنا مستغربة

الرقم كلش مو حلو حده مخربط كل رقم بصوب

وبعدين واذا نفس رقمه يعني بيمع كل الأرقام إلي نفس رقمه؟

شي غريب :)

-----

بعدها بجم يوم

بمواقف جمعية الشامية بركب سيارتي

وأسمع واحد يصرخ

لو سمحتي !

نعم؟

الموتر للبيع؟

شنو؟؟؟

سيارتج تبيعينها؟

لأ !

-----

ركبت سيارتي وصكيت الباب

وأهو يطالعني شكله كان بيسأل بعد أسئله

جان أنحاش وانا منصدمة

شسالفة!؟ مو كاتبة للبيع عشان يسأل

وبعدين اشفيهم الناس على أشيائي بيشترونهم !!!

هاهها

-----

اليوم بعد الدوام بروح أعيش ببيت خالي لمدة أسبوع

خالي وزوجته سافروا الصبح ووصوني على عيالهم يويو وهشومي

بصير الأم والأبو

وناسة :)

أحلى شي إن طريج الدوام بيصير دقيقة وحدة

بيتهم لازق بدوامي