لما أتذكر الغزو العراقي الغاشم على دولتنا الحبيبة الكويت
أتذكر عمي الله يرحمه
إلي خذوه أسير بطيارة صغيرة فيها مروحيتين
أتذكر لما رجعوه الكويت بعد الغزو وكان فاقد الذاكرة لأن بالسجن
كان يغلط عليهم ويمدح الكويت فكانوا يعذبونه بالكهربا
وأذكر إن توفى بعد الغزو بجم سنة قبل ما يشوف عياله إلي كانوا أسرى أيضا
-----
لما أتذكر الغزو
أتذكر عيال عمي الله يرحمه ويرحمهم
كانوا توأم متشابه
وكانوا في المقاومة ومتطوعين بالمخبز
يخبزون حق الأهالي ويوزعون أكل على البيوت
وكان واحد منهم متزوج قبل الغزو بجم اليوم
خذوهم أسرى ولي اليوم ما شفناهم
الله يتقبلهم شهداء ويرحمهم جميعا
-----
لما أتذكر الغزو
أتذكر زوج خالتي الي خذوه أسير من المسجد وكان وقتها يصلي صلاة الجمعة
خذوه مع كل الكويتيين الي كانوا بالمسيد
ورجعوه لنا خلال فترة الغزو أيضا
كنت وقتها في بيت خالتي
أتذكر الصمونة إلي طلعها من مخباته يورينا إياها
صمونة يابسة صخررر هذي كانت وجبتهم بالسجون العراقية
-----
لما أتذكر الغزو
أتذكر نقاط السيطرة
وشلون كانوا العراقيين يوقفونه بنص الشارع ويفتشون السيارة
-----
لما أتذكر الغزو
أتذكر سرداب بيت يدي إلي عشنا فيه نص فترة الغزو
ومعانا مو أقل من خمس عوايل كلهم سكان الفريج
-----
لما أتذكر الغزو
أتذكر العيوز إلي بيتها بالمنصورية كانت تبيع حلاو كل الأنواع نروح ونشتري منها
-----
لما أتذكر الغزو
أتذكر المطر الأسود ونقط المطر الملوث بالنفط موجودة على ملابسي خاشتهم لي الحين
-----
لما أتذكر الغزو
أتذكر الخوف خصوصا لما بدت الضربة الجوية وكنت وقتها نايمة فوق
ويت أمي قعدتني وقالت بسرعة روحي السرداب
-----
لما أتذكر الغزو
أتذكر تنكر الماي إلي ايينا كل فترة يسوقونه كويتيين
وكنا نترس درام الزبالة مال الشارع ماي
عشان نغسل منه لأن ماكو ماي!
-----
لما أتذكر الغزو
أتذكر الفوانيس الي نشبهم بالليل لأن ظلمة ماكو كهربا
والظهر لأن ظلمة ماكو شمس بسبب الغيوم السودة من دخان حرائق الآبار
-----
لما أتذكر الغزو
أتذكر بياع الألعاب الهندي بجمعية الفيحا
لي الحين موجود محله بالمواقف
كان يبيع علينا أثاث بيت باربي بأسعار رخيصة
-----
لما أتذكر الغزو
أتذكر الدرايش لما لزقنا عليهم جلاد كتب
عشان ما يتكسرون من صوت القصف
-----
لما أتذكر الغزو
أتذكر لما رحنا بيتنا بمنطقة ثانية ناخذ أغراض
لقينا الباب مكسور وبايقين التلفزيون والفيديو وأشياء وايد
-----
لما أتذكر الغزو
أتذكر خالي لما طقوه العراقيين وربطوه بالسيارة وسحبوه
لأن أبيض وأشقر وعنده نمش
عبالهم أمريكي !
-----
لما أتذكر الغزو
أتذكر لما كنت أتسلق فوق الملحق في بيت يدي
ومرة صعدت جان أشوف خالي مع مجموعة شباب المقاومة
قاعدين دائرة وحاطين خناجر وسجاجين وأسلحة بالنص !
-----
لما أتذكر الغزو
أتذكر العراقية الي كانت لابسة لبس عسكري وجوتي جيش أسود كبير
وحاطة عباية قصيرة على راسها !!
كانت تمشي جدام بيتنا وكنت أطالعها من الفتحة تحت الباب
وكانت إختي الصغيرة منسدحة بالحوش يمي وكنت صاكة حجلها بإيدي
عشان ما تتكلم ويسمعون صوتنا
كان رعب !!
-----
لما أتذكر الغزو
أتذكر لما يمعنا كل الدفاتر والكشاكيل الي عليهم
صورة بابا جابر وبابا سعد الله يرحمهم
وخشيناهم مع أعلام الكويت
-----
لما أتذكر الغزو
أتذكر وااايد أشياء
ووايد مواقف
مستحيل أنسى أي شي منهم
بس إذا كتبتهم يبيلي كتاب كامل :)
-----
يارب تحفظ ديرتنا الحلوة الكويت من كل شر
we can't 4get & we won't
ReplyDeletea lot of memories..
حسيت بقشعريرة لما قريت كلامج
ReplyDeleteما كنت مولودة ايام الغزو
وحسيت بجزء من المعاناة اللي عايشينها
ليش لا سوي كتاب سميه
لما أتذكر الغزو
او في ذكرى الغزو وكتبيلنا من هالاشياء الحلوة وانا من اول المشترين :)
يعطيج العافية
والله يحفظ كويتنا ويحميها من عيون الحساد وشر الحاقدين
الله لا يعيد هالايام
ReplyDeleteويحفظنا ويستر علينا
اذا بنتكلم عن الغزو ,,,ماراح يكفينا كتاب وكتابين
.والله نكتب مجلدات من المآسي
موضوع وايد حلو لانه يخلينا نتعض ونعرف معنى النعمه الى احنا فيها والى فقدناها اثناء الغزو
الله لا يعيد هالايام
ReplyDeleteويحفظنا ويستر علينا
اذا بنتكلم عن الغزو ,,,ماراح يكفينا كتاب وكتابين
.والله نكتب مجلدات من المآسي
موضوع وايد حلو لانه يخلينا نتعض ونعرف معنى النعمه الى احنا فيها والى فقدناها اثناء الغزو
آمين
ReplyDeleteالله يحفظ ديرتنا من كل شر
ReplyDeleteوالله لا يعيدها من أيام
الله لا يعودها من ايام
ReplyDeleteوالله يحفظ الكويت يارب
:)
يعطيج العافية
ابكيتيني
ReplyDeleteأعرف ان ردي متأخر جداً بس والله خنقتني العبرة من كلامك مررررة والله حزنت ..
ReplyDeleteالله لايعيدها عليكم ولا على كل مسلم
أختك من السعودية
إبتهال
الحقيقة لم استطع ان امر مرور سريع على السطور كالعادة ولكن اسلوبك المبدع اجبرني على قرأة الموضوع كاملا
ReplyDeleteاسلوبك بالكتابة رائع ومشوق ومؤثر
Hope ...
ReplyDeleteExactly
هديل ...
ReplyDeleteيبيله كتاب :)
آمين
عزيز ...
ReplyDeleteفعلا إحنا في نعمة ولله الحمد
الله لا يغير علينا
Fiona ...
ReplyDeleteآمين
bhr.qadsaweya ...
ReplyDeleteآمين
والله يعافيج :)
Flamingoliya ...
ReplyDelete:*
ابتهال ...
ReplyDeleteآمين
والله يحفظ كل بلاد المسلمين من كل شر
Majed ...
ReplyDeleteشكرا على المرور والتعليق المشجع