Thursday, October 28, 2010

It's a Small World After All

قبل كنا نقول الكويت صغيرة
ولي الحين نقولها
بس لما وصلتني هالرسالة قلت العالم صغير!
صج العالم صار صغير سبحان الله :)
تذكرون هالصورة؟

نزلتها في هذا الموضوع بشهر 4
Click Here
-----
هالبنت طرشت لي رسالة في فلكر @@
اهي مو ضايفتني بفلكر ولاتعرف موقعي ولا ايميلي ولا حتى اسمي
مادري شلون لقت الصورة مع إنها قديمة
وطرشت تقول:
Hi :)
Alheen
Ana elly kent fe Dubai o glty tabeen t9awreen my shirt

lamma knt wagfa fel kushk elly 7ag el balayz o glty mara7

t6al3een wajheee, 9a7?! :X


جان أكتب لها رد أعتذر وقلت لها إني ماأذكر إني قلت ماراح أطلع ويهها
واذا تبين أمسح الصورة
وصج إلي أذكره إني قلت لها بصورها وبحطها بالموقع
عاد يحليلها ردت علي إن لا عادي لا تعتذرين وخلي الصورة :)
-----
So cute :)
بس
الغريب شلون البنت وصلت حق صورتها من بين كل المواقع بالانترنت
LOL

Monday, October 25, 2010

Amazon Will Let You Loan Kindle Books To A Friend

أعلن الموزع الإلكتروني أمازون أنه سيفتح المجال أمام مستخدميه لإعارة
كتبهم الإلكترونية التي يمكنهم قراءتها عبر نظام كيندل إلى أخرين
وأشارت المجموعة على موقعها الإلكتروني إلى أن الخدمة هذه سوف تتوافر بحلول نهاية العام الحالي
وأوضحت أنه بالإمكان إعارة كل كتاب مرة واحدة لمدة 14 يوما
لكن مالكه لن يتمكن من قراءته خلال هذه الفترة
لن تكون الكتب جميعها متاحة للاعارة والقرار هنا يعود إلى الناشر أو إلى صاحب
الحقوق الذي يحدد ما هي المؤلفات التي يسمح بإعارتها

Thursday, October 21, 2010

الحمدلله رب العالمين

ومر شهر على كتابتي لآخر موضوع

وبهالشهر تغيرت أشياء وايد

ما أقول تغيرت لأن حياتي نفسها بس انضافت لها أشياء ييديدة

ليش الناس تسمي الزواج صفحة جديدة؟ وحياة جديدة؟؟

وليش الناس يتغيرون بعد الزواج؟

وليش يمسحون شغلات وايد من حياتهم؟ شغلات كانت جزء من يومياتهم؟

اهتمامات هوايات صداقات طقوس يومية معينة ... إلخ !

المفروض إن الزوج وعايلته والالتزامات الجديدة تنضاف لبرنامج الشخص وينظم جدوله وأولوياته بس ما يلغي إلي كان موجود قبل

ولا يلغي شخصيته ولا خططه ولا أهدافه وأحلامه

وهذا هو الصح

-----

خلال الثلاثين يوم إلي طافوا كان عرسي

كنت أحلم بعرس صغير بالبيت

ولكن صار العكس لأن الوالدة الله يحفظها تبي تعزم كل إلي تعرفهم :p

كانت حفلة كبيرة بفندق بس كانت أجمل من إلي كنت أحلم فيه ولله الحمد

كل شي كان حلو والكل كان مستانس

كان ودي لو كنت أقدر أمسك كامرتي وأصور ههه

وطبعا كان في حضور من البنات إلي تعرفت عليهم في عالم المدونات

وأيضا صديقاتي من مصر والهند وباكستان وغيرهم

:)

-----

أشكر من كل قلبي أبوي حبي الأول وأمي الغالية وإخواني وخواتي

وأهلي وصديقاتي خصوصا البرايد ميدز

أحبكم وايد والله يخليكم لي

-----

طرنا بعدها إلى بيت الله الحرام

اقتراح زوجي كان تأدية العمرة في البداية

وكان أحلى قرار وأسأل الله سبحانه وتعالى أن يتقبل منا

-----

بعدها اتجهنا لتايلند

تايلند ما كانت بالخطة أبدا

طول عمري أبي أروح إيطاليا بشهر العسل مثل أمي وأبوي

بس صادف إن موسم أمطار فأجلناها

وقلنا نختار بلد في شرق آسيا لأننا من عشاق هالدول

طبعا الصين ما تصلح والصدفة إن اثنينا زايرينها خلال هالسنة :)

فاحترنا بين بالي وتايلند حتى استقرينا على تايلند

-----

جزيرة بوكيت ومدينة بانكوك يحتاجون موضوع لهم

فيهم أماكن وايد حلوة أنصح بزيارتها

راح أتكلم عنهم مع الصور في وقت قريب إن شاءالله

-----

رجعت الكويت ولقيت أخوي مع زوجته منتقلين لندن للشغل !

وأخوي الثاني لي الحين مارجع أستراليا يعني عندي وقت أستانس معاهم الحمدلله

:D

-----

اليوم أول يوم دوام بعد إجازة الـ 15 يوم إلي سمحوا لي فيهم وكانوا من غير راتب بعد

وأمس كان إضراب للعمالة إلي يسوون الجاي @@

حسافة طافني ما شفت شصار :)

-----

إي نسيت! قبل عرسي بيومين كنت طالعة ورجعت البيت شفت سيارات غريبة ماعرفهم

دشيت جان ألقى كل بنات خالاتي! مسوين لي حفلة مفاجأة

لتوديع العزوبية ههه :)

يايبين أكل وكيك وهدايا عجيبين ولعبنا مسابقات وكان في عرض فلم عني

صور آنا عمري ما شفتهم مادري من وين يايبينهم

واقعدوا عندي إلى الساعة 1 بالليل

كان يوم وايد حلو ماراح أنساه

-----

أمبيه كتبت وايد

خلاص أتمنى لكم إجازة نهاية أسبوع جميلة

مع الجو الجميل