Thursday, July 31, 2008

شلون ممكن تتصرفون؟

---

I really miss my blog :)
It feels like ages since I last posted !

---

ودي أكتب مغامراتي خلال الأسبوعين الماضيين

ولكن في موضوع شاغل بالي

---

لو بختصر الموضوع بجملة وحدة بقول

كل واحد أهله مسؤولين عنه احنا اشعلينا !!!

---

نسمع هالجملة وايد صح؟

---

أذكر شخص مصري قبل شهرين تقريبا قال كلام ثمين الصراحة

يقول أيام أول بمصر إذا صادفت المرأة بالطريق أو بالسوق واحد

من أبناء الجيران يغازل البنات ويأذيهم

أقل شي ممكن تسويه إنها تطقه بالجزمة

(بالكويتي جوتي)

وإذا شافت أبوه (والده) تقوله اليوم شفت ولدك يأذي الناس وطقيته

يرد يقولها: مشكورة يزاج الله خير زين سويتي فيه

ويكون فرحان طبعا لأنها أدبت ولده

---

كانت التربية جماعية ويتساعدون فيها

---

شي وايد حلو :)

بس لو يصير هالموقف بهالأيام ردة فعل الأب بتكون مختلفة تماما

بياكلها بلسانه !

اشعليج وليش طاقة ولدي وانتي مو مسؤولة عن عيال الناس وانا أعرف أربي ولدي

وقد يصل الموقف إلى أنه يسبها ويمكن أكثر من جذي

وحتى لو كانت زافة الولد بس يعني مو طاقته

بيوصلها كلام شديد اللهجة من أهل الولد

---

سبحان الله ردة فعل مختلفة تماما الحين عن قبل 20 سنين مضت

---

آنا أشوف الحين حتى لو شخص أدب واحد من الأهل وليس شخص غريب

مثلا ولد أخوه أو ولد عمه

قد يؤدي لخلافات كبيرة بين العائلتين

فالواحد قام يخاف يتكلم ويقول خلينا بعيد أحسن

---

وحدة من شلتنا (مجموعة صديقاتي القريبات) كانت صديقة إحدانا

ولكن دائما تطلع معانا ونشوفها

بعد مدة اكتشفنا إنها صاحبة مشاكل

ومرة صار موقف قوي وهوشة كبيرة واكتشفنا إنها فيها مرض الكذب

:) أم شلاخ

(مع الأسف في وايد منهم هاليومين شباب وبنات)

وصارت سالفة كبيرة وهوشة وأهلنا دروا وتدخلوا وأنهوا الموضوع

وقالولنا ابتعدوا عنها ويا ويلها إلي تكلمها وقطعوا علاقتكم نهائيا فيها

إحنا من ورا أهلنا ما قطعنا العلاقة نهائيا

قطعناها فترة بعدين كلمناها وزفيناها وحسسناها بالذنب

وتخيلوا البنت جدام أهلها ماكو إحساس لما يعاقبونها

بس إحنا بكلمتين يعورون خليناها تستحي على ويهها

ووعدتنا تتغير وفعلا تغيرت وايد

ومع هذا ظلينا نعاقبها ووايد طلعات ما نسمح لها اتيي معانا

وقامت ما تتجرأ تسوي شي غلط جدامنا

---

البنت من بعدها ما ضرتنا وعموما كنا حذرين ونادرا ما نكلمها أو نشوفها

والحين صار على السالفة سنة أو أكثر

هالأسبوع البنت سوت مشكلة وأهلها (اكتشفوا) طاحوا عليها

السالفة قوية حيل بس ما أحس إن أهلها قاعدين يتعاملون مع الموضوع على كبر حجمه

والبنت كلمت صديقتي اليوم وعادي ولا كأنها مرتكبة خطأ أو مسوية شي

آنا ما ألوم أهلها الصراحة لأن محد يقدر عليها!

وأدري شلون التربية في هالوقت وايد صعبة

والأهل صعب عليهم يتعاملون مع مشاكل الأبناءخصوصا إنهم من جيلين مختلفين تماما

ودائما ألاحظ إن الولد أو البنت إذا سمع تأنيب ونصيحة من شخص في عمره راح يتأثر بالتأكيد

خصوصا إذا كان صديق يحترمونه ويحبونه ويشوفون فيه مواصفات الشخص المحترم والخلوق

ولكن طريقة الوالدين غالبا ما تكون متسرعة وعقاب من غير نقاش ولا تفكير

لن يؤثر وإذا أثر فسيكون لفترة بسيطة فقط وسيعودون الأبناء لنفس الخطأ من غير علم الأهل

---

المشكلة تخص البنت بروحها هذه المرة

يعني ما اغلطت علينا ولا كان أحد منا معاها

ولكن إحساسنا بالمسؤولية يخلينا نبي نكلمها

ومازلت أسمع كلام مثل لا تكلمينها ترا تتبلى عليكم

مالج شغل أهلها يربونها

ولا تتدخلين وتدخلين نفسج بمشاكل

آنا الصراحة وايد متضايقة ومعصبة من داخلي

خصوصا إنا شفناها بمكان قبل المشكلة بساعتين

وجذبت قالت بتروح مكان واهيه واعدتني بعد السالفة القديمة إنها ما تجذب

والله أهلها ما يستاهلون إلي قاعدة تسويه

أمس كلمتنا أمها مسكينة صوتها يعور القلب

أحس أبي أمسك البنت وأقولها لا تتكلمين ولا كلمة لما أخلص كلامي

وأطلع كل الكلام إلي بقلبي

---

تتوقعون أشوف دمعة وحدة تنزل من عديمة الإحساس؟

---

خارج الموضوع

(أكثر شي يخوفني لما أفكر شلون بربي عيالي

وحتى الواحد لو ضمن تربية صحيحة في بيئة صحية ونظيفة لا بد إن المدرسة

والأصدقاء والبيئة الخارجية تأثر وتخرب)

شي يخوف الصراحة :(

---

9 comments:

QC said...

موضوع حلو الصراحه

المشكلله مو في التربية المشكله انه هالايام كل واحد مسوي نفسة علامة الزمان
عسى ماواحد كلمه بشي قال ادري
انزين مدام تدري هذا غلط ليش تسويه !!

بس هم ارجع و اقوول "اللي اهله ما ادبوه الناس تادبه" لانه الناس ماترضى إنه احد يغلط عليهم.

و يقوول المثل "الباب إلي إييك منه الريح سده وستريح".

وفي احد خطب الامام علي بن أبي طالب عن الاصدقاء قال " لاتصادق الكذاب فإنه كالسراب ، يقرب إليك البعيد و يبعد عنك القريب".

خارج الموضوع،
الشجرة الطيبة لا تنبت الا طيبا........ والشجرة الخبيثة لا تنبت الا خبيثا.

DanDash said...

مشكلة عدم الأحساس
الله يهديها ان شاء الله و تنتبه للي قاعده تسويه
عن نفسي ما اقدر امسك عمري لازم اتدخل و ابسط شي عيالي الي ادرسهم بالروضة و الله اني الاقي لا اهتمام وتصرفات غلط و اتدخل ما اقدر لكن للأسف المقابل مافي اي اهتمام من الام ولا من الاب

ناصر الكويت said...

مالج شغل بأحد

:)

in6elakah said...

السلام عليكم

استخيري اخيتي في أمر نصيحتك لها
و ادعي ربك بقلب صادق ان يهديها

و راي ان لا تدخلين نفسك بامر قد يجر لك بلاوي لان الوضع غير مأمون ابدا

و لو تدخلين انسانه تعلمين يقينا انها لن تتبلى عليها مثل وحده من خواتها يكون افضل

والله يكون بعونج يا الغاليه
موفقه :)

AAajed said...

أقل شي ممكن تسويه إنها تطقه بالجزمة

(بالكويتي جوتي)

وبالسعودي نعال
: )

chatterbox said...
This comment has been removed by the author.
:: ENG DaLooLa :: said...

La twhgen 3mrich ..b3den t9er omor la t7med 3gbahaa .. ;)

Ra-1 said...

QC ...
صح كلامك :)

DanDash ...
الله يعطيج العافية :)

ناصر الكويت ...
:)

Ra-1 said...

in6elakah ...
:: ENG DaLooLa :: ...
مشكورين بس ترا كلمتها :D

Majed ...
بالكويتي نقول جوتي حق الـ
shoes
ونستخدم نعال حق الـ
slippers
:)