Tuesday, January 13, 2009

الحرس الوطني

أحس إني مداومة في معسكر للجيش !
بما إن دوامي قريب من فندق الشيراتون
والكويت تستضيف القمة العربية الاقتصادية في 19 و 20 يناير
الاستعدادات بدأت من يومين
-----
آنا كل يوم أعطي سيارتي
valet parking
عند الباب
أمس الحرس الوطني إلي متجمعين عند البوابة قالوا ممنوع
رحت صفطت في الوطية والحمدلله لقيت واحد ووحدة معاي
واهمه متعودين يوقفون هناك كل يوم
مشيت معاهم لأن ماعرف الطريج من هناك
نزلنا السوق واكتشفنا إن البوابات مغلقة !!!
باب الخروج الوحيد من الخلف
طلعنا واضطرينا نمشي دائرة كبيرة حتى قدرنا نوصل الدوام
وصلنا ولقينا الدبابة مستقبلتنا عند الباب مع جيبات الحرس الوطني
وكل واحد لابس الخوذة وماسك الرشاش في وضع الاستعداد !!!
لاحظوا إن هذا مو الشيراتون ولكن مبنى قريب منه
-----
اليوم تطور الوضع
ساعة ونص على ما وصلت الدوام !!!
كل سيارة تمر يم الشيراتون يفتشونها
ويصورون كل واحد فيديو وفوتوغرافي
LOL !
-----
ما رضيت أصفط بالوطية المكان يخرع ووايد بعيد
أقنعت موظف الفالي ياخذ سيارتي
نزلت ولقيت باب البناية مغلق !
سألت العسكري قال لي تدخلين من الباب الجانبي
مشيت بين سيارتين مصفحتين ومجموعة جيش عشان أوصل وأدخل
شي يخوف من الصبح
بعد زين إنهم يبتسمون لنا :)
-----
سطح الشيراتون أشوفه من دريشة مكتبي متروس جيش
وهليكوبتر تمر يم دريشتي كل شوي
حسافة الكاميرا مو معاي
ضروري أييبها باجر
بس أخاف يرموني؟
:)

12 comments:

Think-Become said...

il wath3 ma2sawi, allah e3eenich 3ala e66ireeej..

bas its could to have some action in life... this might turn actually a fun thing to see and face

Purgatory said...

maybe you get a vacation during these days and you stay at home ;p

Sugar said...

لا يا معوده

ديري بالج

Anwar Al-Ballam said...

لا يامعوده فليها لووووووول
ربعنا صارو مايتغشمرون

bored said...

it's only gonna get worse

New Bride said...

واااي الله يعينج على اللويه

بس و الله ترى وناسة و تغيير :) تحسين في شي يديد

AAajed said...

عاد الله الله بأخبار القمه
نبي اخبار طازة وحصربه من (آر ون) م
القمه قريبه من مكان عملك ومالك عذر

بس صور مانبي حرصا على سلامتك

تدرين لو في دريتنا واحد صادوه يصور في وضع امني زي الوضع الموجود عندكم الآن
وش يسوون فيه

يودونه في ابو زعبل
!!!!!!

بس شكل ربعكم حليويين
كف كفين ويطلعونه

AAajed said...

Your comment has been saved and will be visible after blog owner approval.


والله ياشكلك امراءه متسلطه

ناصر الكويت said...

حاولي تغشمرين وياهم

قطي عليهم شئ ترا دمهم خفيف ويحبون الغشمره

Ra-1 said...

Think-Become ...
Hehee you are right :)

Purg ...
Chan zain :)
walla elmafroth ya36oona off at least the 2 days of the conference!

Sugar ...
:)

Ra-1 said...

Anwar Al-Ballam ...
إي والله يخوفون :)

bored ...
E akeed

New Bride ...
إي كل يوم مواقف غريبة نسولف عنها
LOL :)

Ra-1 said...

Majed ...

!ما يصير أخبار بدون صور ما أقدر
بس راح أحاول حرصا على سلامتي :)
---

هاهها شنو أبو زعبل؟
---

LOL!
والله عاد مو متسلطة حدي ديمقراطية
بس بعض المريضين نفسيا من المعلقين أجبروني أجرب أكون دكتاتورية
:)


ناصر الكويت ...

واحد بالدوام قال بيجرب يقط عليهم بلونات ماي من فوق
:)