Monday, August 02, 2010

We will Never forget 2.Aug.1990

لما أتذكر الغزو العراقي الغاشم على دولتنا الحبيبة الكويت

أتذكر عمي الله يرحمه

إلي خذوه أسير بطيارة صغيرة فيها مروحيتين

أتذكر لما رجعوه الكويت بعد الغزو وكان فاقد الذاكرة لأن بالسجن

كان يغلط عليهم ويمدح الكويت فكانوا يعذبونه بالكهربا

وأذكر إن توفى بعد الغزو بجم سنة قبل ما يشوف عياله إلي كانوا أسرى أيضا

-----

لما أتذكر الغزو

أتذكر عيال عمي الله يرحمه ويرحمهم

كانوا توأم متشابه

وكانوا في المقاومة ومتطوعين بالمخبز

يخبزون حق الأهالي ويوزعون أكل على البيوت

وكان واحد منهم متزوج قبل الغزو بجم اليوم


خذوهم أسرى ولي اليوم ما شفناهم

الله يتقبلهم شهداء ويرحمهم جميعا

-----

لما أتذكر الغزو

أتذكر زوج خالتي الي خذوه أسير من المسجد وكان وقتها يصلي صلاة الجمعة

خذوه مع كل الكويتيين الي كانوا بالمسيد


ورجعوه لنا خلال فترة الغزو أيضا

كنت وقتها في بيت خالتي

أتذكر الصمونة إلي طلعها من مخباته يورينا إياها

صمونة يابسة صخررر هذي كانت وجبتهم بالسجون العراقية

-----

لما أتذكر الغزو

أتذكر نقاط السيطرة

وشلون كانوا العراقيين يوقفونه بنص الشارع ويفتشون السيارة

-----

لما أتذكر الغزو

أتذكر سرداب بيت يدي إلي عشنا فيه نص فترة الغزو

ومعانا مو أقل من خمس عوايل كلهم سكان الفريج

-----

لما أتذكر الغزو

أتذكر العيوز إلي بيتها بالمنصورية كانت تبيع حلاو كل الأنواع نروح ونشتري منها

-----

لما أتذكر الغزو

أتذكر المطر الأسود ونقط المطر الملوث بالنفط موجودة على ملابسي خاشتهم لي الحين

-----

لما أتذكر الغزو

أتذكر الخوف خصوصا لما بدت الضربة الجوية وكنت وقتها نايمة فوق

ويت أمي قعدتني وقالت بسرعة روحي السرداب

-----

لما أتذكر الغزو

أتذكر تنكر الماي إلي ايينا كل فترة يسوقونه كويتيين

وكنا نترس درام الزبالة مال الشارع ماي

عشان نغسل منه لأن ماكو ماي!

-----

لما أتذكر الغزو

أتذكر الفوانيس الي نشبهم بالليل لأن ظلمة ماكو كهربا

والظهر لأن ظلمة ماكو شمس بسبب الغيوم السودة من دخان حرائق الآبار

-----

لما أتذكر الغزو

أتذكر بياع الألعاب الهندي بجمعية الفيحا

لي الحين موجود محله بالمواقف

كان يبيع علينا أثاث بيت باربي بأسعار رخيصة

-----

لما أتذكر الغزو

أتذكر الدرايش لما لزقنا عليهم جلاد كتب

عشان ما يتكسرون من صوت القصف

-----

لما أتذكر الغزو

أتذكر لما رحنا بيتنا بمنطقة ثانية ناخذ أغراض

لقينا الباب مكسور وبايقين التلفزيون والفيديو وأشياء وايد

-----

لما أتذكر الغزو

أتذكر خالي لما طقوه العراقيين وربطوه بالسيارة وسحبوه

لأن أبيض وأشقر وعنده نمش

عبالهم أمريكي !

-----

لما أتذكر الغزو

أتذكر لما كنت أتسلق فوق الملحق في بيت يدي

ومرة صعدت جان أشوف خالي مع مجموعة شباب المقاومة

قاعدين دائرة وحاطين خناجر وسجاجين وأسلحة بالنص !

-----

لما أتذكر الغزو

أتذكر العراقية الي كانت لابسة لبس عسكري وجوتي جيش أسود كبير

وحاطة عباية قصيرة على راسها !!

كانت تمشي جدام بيتنا وكنت أطالعها من الفتحة تحت الباب

وكانت إختي الصغيرة منسدحة بالحوش يمي وكنت صاكة حجلها بإيدي

عشان ما تتكلم ويسمعون صوتنا

كان رعب !!

-----

لما أتذكر الغزو

أتذكر لما يمعنا كل الدفاتر والكشاكيل الي عليهم

صورة بابا جابر وبابا سعد الله يرحمهم

وخشيناهم مع أعلام الكويت

-----

لما أتذكر الغزو

أتذكر وااايد أشياء

ووايد مواقف

مستحيل أنسى أي شي منهم

بس إذا كتبتهم يبيلي كتاب كامل :)

-----

يارب تحفظ ديرتنا الحلوة الكويت من كل شر

18 comments:

Hope said...

we can't 4get & we won't
a lot of memories..

هديــل said...

حسيت بقشعريرة لما قريت كلامج

ما كنت مولودة ايام الغزو

وحسيت بجزء من المعاناة اللي عايشينها

ليش لا سوي كتاب سميه

لما أتذكر الغزو

او في ذكرى الغزو وكتبيلنا من هالاشياء الحلوة وانا من اول المشترين :)

يعطيج العافية

والله يحفظ كويتنا ويحميها من عيون الحساد وشر الحاقدين

عزيز said...

الله لا يعيد هالايام
ويحفظنا ويستر علينا
اذا بنتكلم عن الغزو ,,,ماراح يكفينا كتاب وكتابين
.والله نكتب مجلدات من المآسي

موضوع وايد حلو لانه يخلينا نتعض ونعرف معنى النعمه الى احنا فيها والى فقدناها اثناء الغزو

عزيز said...

الله لا يعيد هالايام
ويحفظنا ويستر علينا
اذا بنتكلم عن الغزو ,,,ماراح يكفينا كتاب وكتابين
.والله نكتب مجلدات من المآسي

موضوع وايد حلو لانه يخلينا نتعض ونعرف معنى النعمه الى احنا فيها والى فقدناها اثناء الغزو

الوتيــــــــــن said...

آمين

Fiona said...

الله يحفظ ديرتنا من كل شر

والله لا يعيدها من أيام

bhr.qadsaweya said...

الله لا يعودها من ايام
والله يحفظ الكويت يارب

:)
يعطيج العافية

Flamingoliya said...

ابكيتيني

Anonymous said...

أعرف ان ردي متأخر جداً بس والله خنقتني العبرة من كلامك مررررة والله حزنت ..

الله لايعيدها عليكم ولا على كل مسلم


أختك من السعودية

إبتهال

AAajed said...

الحقيقة لم استطع ان امر مرور سريع على السطور كالعادة ولكن اسلوبك المبدع اجبرني على قرأة الموضوع كاملا

اسلوبك بالكتابة رائع ومشوق ومؤثر

Ra-1 said...

Hope ...

Exactly

Ra-1 said...

هديل ...

يبيله كتاب :)

آمين

Ra-1 said...

عزيز ...

فعلا إحنا في نعمة ولله الحمد
الله لا يغير علينا

Ra-1 said...

Fiona ...

آمين

Ra-1 said...

bhr.qadsaweya ...

آمين
والله يعافيج :)

Ra-1 said...

Flamingoliya ...

:*

Ra-1 said...

ابتهال ...

آمين
والله يحفظ كل بلاد المسلمين من كل شر

Ra-1 said...

Majed ...

شكرا على المرور والتعليق المشجع