Friday, August 06, 2010

Q8 bbq

 :p الأسبوع إلي طاف قاعدة أتمشى داخل الانترنت
وصدفة وصلت مكان "باربكيو" شوي !
الموقع كان غريب وشي ييديد لفت نظري
خصوصا إن شاب كويتي يبيع شغلات جاهزة للشوي وحاط عليها الخلطة وكل شي
ويوصلون للبيت أو الشاليه والمزرعة
عاد آنا كنت بروح العبدلي بعدها بيوم فقلت خل أطلب وأجرب
-----
أول شي معاملتهم وايد حلوة
وثاني شي مواعيدهم مضبوطة
وثالث شي يتأكدون منكم إن الطلب وصل وإذا كل شي أوكي وعاجبكم
:)
-----
الموقع هو 
-----
آنا طلبت سلطة اسمها
3abdely Salad
وعندهم أنواع ثانية بس آنا بما إني بروح العبدلي
قلت لازم سلطة العبدلي عشان يلوق ههه
بس نسيت أصورها :)
-----
وطلبت هوت دوج
بس كان جاهز نفس إلي بالجمعية
-----
إلي عجبني الشغلتين الثانيين
أول شي الـ
Condiments Basket
شكلها يونس وفيها عشر أشياء
-----
"click on any photo for a larger view"

-----
-----
وثاني شغلة الـ
Buffalo Chicken Wings
كان وايد حلو
وهذي صور أثناء وبعد الشوي

-----
-----
-----
-----
وإن شاءالله مرة ثانية نجرب أنواع ثانية
Thank you Q8 bbq!
-----
 آخر جمعة قبل رمضان المبارك :) 
 اللهم بلغنا رمضان و أنت راض عنا غير غضبان 

Monday, August 02, 2010

We will Never forget 2.Aug.1990

لما أتذكر الغزو العراقي الغاشم على دولتنا الحبيبة الكويت

أتذكر عمي الله يرحمه

إلي خذوه أسير بطيارة صغيرة فيها مروحيتين

أتذكر لما رجعوه الكويت بعد الغزو وكان فاقد الذاكرة لأن بالسجن

كان يغلط عليهم ويمدح الكويت فكانوا يعذبونه بالكهربا

وأذكر إن توفى بعد الغزو بجم سنة قبل ما يشوف عياله إلي كانوا أسرى أيضا

-----

لما أتذكر الغزو

أتذكر عيال عمي الله يرحمه ويرحمهم

كانوا توأم متشابه

وكانوا في المقاومة ومتطوعين بالمخبز

يخبزون حق الأهالي ويوزعون أكل على البيوت

وكان واحد منهم متزوج قبل الغزو بجم اليوم


خذوهم أسرى ولي اليوم ما شفناهم

الله يتقبلهم شهداء ويرحمهم جميعا

-----

لما أتذكر الغزو

أتذكر زوج خالتي الي خذوه أسير من المسجد وكان وقتها يصلي صلاة الجمعة

خذوه مع كل الكويتيين الي كانوا بالمسيد


ورجعوه لنا خلال فترة الغزو أيضا

كنت وقتها في بيت خالتي

أتذكر الصمونة إلي طلعها من مخباته يورينا إياها

صمونة يابسة صخررر هذي كانت وجبتهم بالسجون العراقية

-----

لما أتذكر الغزو

أتذكر نقاط السيطرة

وشلون كانوا العراقيين يوقفونه بنص الشارع ويفتشون السيارة

-----

لما أتذكر الغزو

أتذكر سرداب بيت يدي إلي عشنا فيه نص فترة الغزو

ومعانا مو أقل من خمس عوايل كلهم سكان الفريج

-----

لما أتذكر الغزو

أتذكر العيوز إلي بيتها بالمنصورية كانت تبيع حلاو كل الأنواع نروح ونشتري منها

-----

لما أتذكر الغزو

أتذكر المطر الأسود ونقط المطر الملوث بالنفط موجودة على ملابسي خاشتهم لي الحين

-----

لما أتذكر الغزو

أتذكر الخوف خصوصا لما بدت الضربة الجوية وكنت وقتها نايمة فوق

ويت أمي قعدتني وقالت بسرعة روحي السرداب

-----

لما أتذكر الغزو

أتذكر تنكر الماي إلي ايينا كل فترة يسوقونه كويتيين

وكنا نترس درام الزبالة مال الشارع ماي

عشان نغسل منه لأن ماكو ماي!

-----

لما أتذكر الغزو

أتذكر الفوانيس الي نشبهم بالليل لأن ظلمة ماكو كهربا

والظهر لأن ظلمة ماكو شمس بسبب الغيوم السودة من دخان حرائق الآبار

-----

لما أتذكر الغزو

أتذكر بياع الألعاب الهندي بجمعية الفيحا

لي الحين موجود محله بالمواقف

كان يبيع علينا أثاث بيت باربي بأسعار رخيصة

-----

لما أتذكر الغزو

أتذكر الدرايش لما لزقنا عليهم جلاد كتب

عشان ما يتكسرون من صوت القصف

-----

لما أتذكر الغزو

أتذكر لما رحنا بيتنا بمنطقة ثانية ناخذ أغراض

لقينا الباب مكسور وبايقين التلفزيون والفيديو وأشياء وايد

-----

لما أتذكر الغزو

أتذكر خالي لما طقوه العراقيين وربطوه بالسيارة وسحبوه

لأن أبيض وأشقر وعنده نمش

عبالهم أمريكي !

-----

لما أتذكر الغزو

أتذكر لما كنت أتسلق فوق الملحق في بيت يدي

ومرة صعدت جان أشوف خالي مع مجموعة شباب المقاومة

قاعدين دائرة وحاطين خناجر وسجاجين وأسلحة بالنص !

-----

لما أتذكر الغزو

أتذكر العراقية الي كانت لابسة لبس عسكري وجوتي جيش أسود كبير

وحاطة عباية قصيرة على راسها !!

كانت تمشي جدام بيتنا وكنت أطالعها من الفتحة تحت الباب

وكانت إختي الصغيرة منسدحة بالحوش يمي وكنت صاكة حجلها بإيدي

عشان ما تتكلم ويسمعون صوتنا

كان رعب !!

-----

لما أتذكر الغزو

أتذكر لما يمعنا كل الدفاتر والكشاكيل الي عليهم

صورة بابا جابر وبابا سعد الله يرحمهم

وخشيناهم مع أعلام الكويت

-----

لما أتذكر الغزو

أتذكر وااايد أشياء

ووايد مواقف

مستحيل أنسى أي شي منهم

بس إذا كتبتهم يبيلي كتاب كامل :)

-----

يارب تحفظ ديرتنا الحلوة الكويت من كل شر

Tuesday, July 13, 2010

Ra1 is taken!

عندما تكون الأوسط يتحتم عليك أن تبحث لنفسك

عن هوية لا تشبه الكبار ولا يفهمها الصغار

لكي تكرس فرادتك

كان علي أن أدشن عالمي الخاص

-----

الكلمات السابقة للكاتبة بثينة العيسى تنطبق علي تماما

حيث كنت الأوسط بين إخواني وأخواتي وكنت المختلفة

أو غريبة الأطوار كما يقولون :)
-----

وكما أقول دائما فالحياة رحلة ومحطات

ولأني شاركت مدونتي هذه بمحطات عديدة من حياتي

فلابد أن أشاركها بمحطة مهمة
وهي محطة الزواج
-----
وللمرة الأولى لا أكتب موضوعي وحيدة
ولكن أكتب وبجانبي شخص يقرء كلماتي
ويساعدني على صياغة الجمل والتعبير عن ما يجول بخاطري
وهذا الشخص هو زوجي الذي أحب فكرة هذه المذكرات :)
-----
أسأل الله سبحانه وتعالى أن يوفقني ويوفقكم

ويحقق أحلام الجميع

Monday, June 28, 2010

Working with girls is a disaster!

وأخيرا توظفت :)
بعد استراحة مدتها ستة أشهر زرت خلالها أخي في أستراليا
وزرت الصين في رحلة سريعة مع أخي الذي يصغرني بخمس سنوات
وأختي التي تصغرني بثمان سنوات
كانت من أجمل الرحلات وأمتعها
أخوي أول مرة يروح الصين فآنا وأختي كنا المرشدات السياحيات
تفاصيل الرحلتين عندي في دفتر مذكراتي الذي كان يلازمني بالسفر
أنقل لكم لما ألقى وقت وما أكون كسولة :p
-----
بالنسبة للوظيفة هذا الي بتكلم عنه اليوم
أحس إني بنفجر
وقلت أفجر الشحنات السلبية الي فيني بالبلوق :D
آنا لما قررت أنتقل من القطاع الخاص للقطاع الحكومي
أول شي حطيته في بالي إن المكان لازم يكون فيه شغل
آنا وحدة أحب أشتغل وما أحب الملل والوقت الضايع
ووايد سمعت عن الوزارات وإن الوضع سوالف وأكل ونوم
المكان الي اخترته الحمدلله مثل ما أبي
ومن أول أسبوع عطوني مهام وما وقف الشغل وهذا شي وايد حلو
بس الشي المو حلو كلش
اهوه البنات !
المكان أغلبه بنات ومديرتي مره وانا مو متعودة أشتغل مع بنات
من كثر ما الوضع يبجي قاعدة أضحك :)
إلي تتفلسف علي على أساس إني ييديدة
وإلي تغار مني لأن يبوني أحضر كل الاجتماعات بحكم خبرتي السابقة
والي أسلوبها مو حلو
والي تسأل أسئلة غريبة
والي تخز وما تبتسم
!!!
وماكو نظام
أمس واحد شافني أطالع ساعتي وانا أكتب ساعة الخروج لأن ما سوولي البصمة
جان يقول: كتبي 2:30
قت له الساعة 2:15 ماصارت 2:30 مايصير أزيد الوقت وانا طالعة مبجر
جان يضحك وما يقول شي
-----
بس مابي أظلم الكل في جم بنت حليوين وحبيتهم من أول يوم :)
بس البقية أشياء عجيبة وغريبة
بس هذي ميزة عشان كل يوم أرجع البيت وعندي قصص أقولها
hehhe
إي ونسيت أقول لكم عن المكاتب
آنا منصدمة بس مادري إذا كل الأماكن جذي !!!
مكاتب البنات ليش كأنهم غرف أطفال؟؟؟
والله ما تتخيلون ودي أصورهم وأوريكم
ملزقين ستكرز كل مكان وحاطين ألعاب وريش وردي
وجلاد هدايا مغلفين الطوفة والمكتب وصور عيالهم كل مكان
@@

Friday, June 18, 2010

A package from Japan!

ولي الحين ما تابعت ولا مباراة :)

-----
وصلني طرد من اليابان
من صديقتي أيكو :)
سلة فيها كيك وبسكوت ودبين صغار
أهم شي إن ببيتنا محد رضا ياكل منه يقولون
 مو عارفين مكوناته وشكله ما يشوق
وأمي تقول هذيله بوذيين مادري شحاطين فيه ههه
 آنا جازفت وكليت بس والله حلو :p

Friday, June 11, 2010

The waiting is over!

The World Cup is about to kick off :)

Thursday, June 03, 2010

Tagged !!

حده من زمان عن سالفة التاق !!
هبينا فيها فترة بعدين انقطعت
واليوم نرجع لكم بعد ما وصلني الواجب ولازم أحله
-----
قوانين التاج السلطاني
اذكر اسم من طلب منك حل هذا الواجب
تحدث عن ستة أسرار قد لا يكتشفها من يقابلك للمرة الأولى
حول هذا الواجب إلى ستة مدونين، واذكر أسماءهم مع روابط مدوناتهم في موضوعك
اترك تعليقا في مدونة من حولت الواجب إليهم، ليعلموا عن هذا الواجب
-----
نيو برايد هي من طلبت مني حل الواجب
-----
عاد ليش أسرار؟
أسراري وايد هههه

بس خليني أختار ستة :)

أول سر
إن فيني برود أعصاب وماعرف أعصب
ويمكن الشي الوحيد الي يخليني أعصب لما أشوف أحد مايحترم أمه أو أبوه أو يقل أدبه عليهم
عاد وقتها يطلع الجانب الشرير من شخصيتي سواء كنت أعرف الشخص أو لأ !
طبعا في شي قبل هذا أكيد يخليني أعصب وهو اذا أحد غلط علي ديني الإسلامي

ثاني سر
إن أكثر بلدة أحبها وأموت فيها: الصين
ومتابعين بلوقي أكيد عارفين هالشي
بس يمكن مو عارفين إني أتكلم صيني وإني لازم أزور الصين كل سنة
وزرتها هالسنة لمدة خمس أيام تقريبا وما كتبت عن هالشي ;)

ثالث سر
كتومة وأحفظ الأسرار
ومادري ليش الناس تحب تخش أسرارها عندي
عندي أسرار الدنيا كلها :p
شي حلو إن أهلي وصديقاتي يثقون فيني للهالدرجة
ويلجؤون لي لحل مشاكلهم أو لمجرد سماعهم

رابع سر
ماحب الخضار وما آكل سلطات واذا باكل شي لازم يكون سادة ومافيه لون أخضر
:)

خامس سر
أحب الحيوانات وايد
بس ماحب الحشرات وأخاف منهم

سادس سر
إذا تكلمت أتكلم بأكثر من موضوع نفس الوقت @@
يعني عادي أقطع السالفة وأدش بموضوع معاكس تماما
رفيجاتي واخواني كله يزفوني على هالحركة لأن يكونون يسولفون بشي
وفجأة بنص السالفة أدش لهم بموضوع ثاني ماله شغل
بس والله الشي يصير تلقائي مو متعمدة :)
-----
وخلصنا الست أسرار والحين أنقل الواجب لست أشخاص

والشخص السادس مفتوح لأي واحد يحب يشارك
:)

Tuesday, June 01, 2010

صور اعتصام أمس

Yesterday's protest against israel's attack
-----
ابنة الكويتية منى ششتر الموجودة ضمن الأسطول
-----
جانب من الحشد الكبير
-----

الحرية لقافلة الحرية
-----
جيب قناة العربية من دبي
-----
-----
أعتذر عن عدم وضوح الصور لأن كان وايد ظمة :)

Monday, May 31, 2010

Please be there!

أقل شي ممكن نسويه لنعلن عن غضبنا وتضامننا مع أسطول الحرية
والوفد الكويتي المحتجز من قبل إسرائيل
"اعتصام ساحة الإرادة اليوم الساعة 6:30"

Protest against israel's attack
"Today at 6:30 in front of the National Assembly"
It is the least we can do 

Saturday, May 29, 2010

The Haunted Mansion (Part 2)

تكملة لموضوعي السابق والصور تتكلم  :)


تصدقون لقينا اصنصير
وبالطابق الثاني باب الأصنصير وردي

الظاهر إن جناح بنات لأن حتى الحمام وردي !

-----

And we found a swimming pool :D
وماشاءالله الي مشخطبين وكاتبين أساميهم واصلين لي داخل حوض السباحة

وهذ كتابات من داخل القصر
وبدون مبالغة ماكو مساحة فاظية مو كاتبين عليها !!!
يعني أعتقد ثلاث أرباع شباب الكويت داشين وكاتبين ذكرى

-----
طبعا آنا قلت حسافة أطلع وموكاتبة ذكرى
قعدت أدور مساحة فاظية ولما لقيت
ماكان معاي قلم أو لون
وسألت الي معاي محد عنده :(
قعدت أفكر وأدور جان آخذ صخرة
وأحفر فيها الطوفة
كان عمود مو طوفة لأن الطوف متروسين كتابات


وصرت أول بنت تكتب اسمها بالقصر المهجور
وناسة  ;)

Friday, May 21, 2010

My dream came true :)

 I entered the Haunted Mansion in Mishref!
Yes I did and I still cant believe it :D
-----
مثل أي طفل وطفلة عاشوا في مشرف وكل يوم في طلعتهم ودخلتهم للمنطقة
 يمرون على القصر المهجور
ويفكرون ويتخيلون شنو ممكن يكون داخل هالمكان العملاق
-----
وفي الابتدائي والمتوسط بديت أسمع قصص من البنات عن القصر
الي اخوها وربعه شحقوا السور 
والي سمعت قصص من اختها الكبيرة عن ناس ادخلوا وشافوا شغلات غريبة
وسمعوا أصوات مخيفة
وكنا نتيمع في آخر الصف بحصة الاحتياط ونندمج بالقصص من البنات
قد لا تكون قصص حقيقية ولكن مخيفة
خصوصا لما يقولون الي يدش قصر الأشباح ما يقدر يطلع !!
ومازلت أتذكر قصة من وحدة من البنات الي كنا نتجمع حولها وتقول لنا شغلات ما سمعنا عنها من قبل
تقول إن واحد من الشباب الي دخلوا القصر لحقته جنية في الشارع الفاصل بين قطعة خمسة وستة
والجنية مازالت بهالشارع وصار هالشارع بالنسبة لنا مخيف هههه 
-----
قبل أمس تحقق حلمي ودخلت القصر
ولكن بشكل قانوني يعني ما شحقت الطوفة :)
مركز التصوير بالنادي العلمي أخذ تصريح للدخول وفتحوا لنا الباب الخارجي
دخلنا في مجموعة من السيارات ومشينا مسافة إلي أن وصلنا للمباني
وهذي صورة للمبني الرئيسي قبل دخوله
"ضغطوا على الصور لتكبيرها"


شكله صغير بس من داخل كبير جدا ضعنا داخله !
قبل الدخول كان المكان هادي وما نسمع ولا حس كأننا في صحراء خالية
-----
قرينا المعوذات والأدعية ودخلنا القصر ...

المنظر هذا ذكرني بالكويت بعد التحرير مباشرة
-----
yes we walked on these stairs!
-----
"نظرة من النافذة للعالم الجديد"
وبالصورة خزان الماء القديم داخل أسوار القصر
-----
"الطريق للمجهول"
الغرفة في النهاية مظلمة جدا
-----
My excited friends :)
Three of us living in Mishref all our lives
اهمه كانوا بالدور الثاني وانا بالثالث
وأطل عليهم من خلال السقف المتكسر !
-----
" الطريق إلي النهاية ! "
صورة من الدور الثالث
وتقريبا نصه سطح وفي غرف شوية
وفي أماكن وايد تساعد على الانتحار مثل الباب بالصورة :p
-----
ترقبوا الجزء الثاني من الموضوع
مع مزيد من الصور والمفاجآت ;)