Amazon Will Let You Loan Kindle Books To A Friend

أعلن الموزع الإلكتروني أمازون أنه سيفتح المجال أمام مستخدميه لإعارة

كتبهم الإلكترونية التي يمكنهم قراءتها عبر نظام كيندل إلى أخرين
وأشارت المجموعة على موقعها الإلكتروني إلى أن الخدمة هذه سوف تتوافر بحلول نهاية العام الحالي
وأوضحت أنه بالإمكان إعارة كل كتاب مرة واحدة لمدة 14 يوما

لكن مالكه لن يتمكن من قراءته خلال هذه الفترة
لن تكون الكتب جميعها متاحة للاعارة والقرار هنا يعود إلى الناشر أو إلى صاحب

الحقوق الذي يحدد ما هي المؤلفات التي يسمح بإعارتها

الحمدلله رب العالمين

ومر شهر على كتابتي لآخر موضوع

وبهالشهر تغيرت أشياء وايد

ما أقول تغيرت لأن حياتي نفسها بس انضافت لها أشياء ييديدة

ليش الناس تسمي الزواج صفحة جديدة؟ وحياة جديدة؟؟

وليش الناس يتغيرون بعد الزواج؟

وليش يمسحون شغلات وايد من حياتهم؟ شغلات كانت جزء من يومياتهم؟

اهتمامات هوايات صداقات طقوس يومية معينة ... إلخ !

المفروض إن الزوج وعايلته والالتزامات الجديدة تنضاف لبرنامج الشخص وينظم جدوله وأولوياته بس ما يلغي إلي كان موجود قبل

ولا يلغي شخصيته ولا خططه ولا أهدافه وأحلامه

وهذا هو الصح

-----

خلال الثلاثين يوم إلي طافوا كان عرسي

كنت أحلم بعرس صغير بالبيت

ولكن صار العكس لأن الوالدة الله يحفظها تبي تعزم كل إلي تعرفهم :p

كانت حفلة كبيرة بفندق بس كانت أجمل من إلي كنت أحلم فيه ولله الحمد

كل شي كان حلو والكل كان مستانس

كان ودي لو كنت أقدر أمسك كامرتي وأصور ههه

وطبعا كان في حضور من البنات إلي تعرفت عليهم في عالم المدونات

وأيضا صديقاتي من مصر والهند وباكستان وغيرهم

:)

-----

أشكر من كل قلبي أبوي حبي الأول وأمي الغالية وإخواني وخواتي

وأهلي وصديقاتي خصوصا البرايد ميدز

أحبكم وايد والله يخليكم لي

-----

طرنا بعدها إلى بيت الله الحرام

اقتراح زوجي كان تأدية العمرة في البداية

وكان أحلى قرار وأسأل الله سبحانه وتعالى أن يتقبل منا

-----

بعدها اتجهنا لتايلند

تايلند ما كانت بالخطة أبدا

طول عمري أبي أروح إيطاليا بشهر العسل مثل أمي وأبوي

بس صادف إن موسم أمطار فأجلناها

وقلنا نختار بلد في شرق آسيا لأننا من عشاق هالدول

طبعا الصين ما تصلح والصدفة إن اثنينا زايرينها خلال هالسنة :)

فاحترنا بين بالي وتايلند حتى استقرينا على تايلند

-----

جزيرة بوكيت ومدينة بانكوك يحتاجون موضوع لهم

فيهم أماكن وايد حلوة أنصح بزيارتها

راح أتكلم عنهم مع الصور في وقت قريب إن شاءالله

-----

رجعت الكويت ولقيت أخوي مع زوجته منتقلين لندن للشغل !

وأخوي الثاني لي الحين مارجع أستراليا يعني عندي وقت أستانس معاهم الحمدلله

:D

-----

اليوم أول يوم دوام بعد إجازة الـ 15 يوم إلي سمحوا لي فيهم وكانوا من غير راتب بعد

وأمس كان إضراب للعمالة إلي يسوون الجاي @@

حسافة طافني ما شفت شصار :)

-----

إي نسيت! قبل عرسي بيومين كنت طالعة ورجعت البيت شفت سيارات غريبة ماعرفهم

دشيت جان ألقى كل بنات خالاتي! مسوين لي حفلة مفاجأة

لتوديع العزوبية ههه :)

يايبين أكل وكيك وهدايا عجيبين ولعبنا مسابقات وكان في عرض فلم عني

صور آنا عمري ما شفتهم مادري من وين يايبينهم

واقعدوا عندي إلى الساعة 1 بالليل

كان يوم وايد حلو ماراح أنساه

-----

أمبيه كتبت وايد

خلاص أتمنى لكم إجازة نهاية أسبوع جميلة

مع الجو الجميل

Dear Blog ...

Dear Blog, I’m sorry that you and I haven't been spending much time together lately.


Dear Blog, Eid was different, The schedule was the same but it was weird thinking that the coming Eid inshaAllah I won’t be at this house, wont wake up in this room, won’t go to this mosque for Eid Prayer, wont greet these neighbors, won’t watch sunrise in this neighborhood which I was living in for 28 years, yes all my life!


Dear Blog, this working place is so weird, funny and annoying things happen here every day, one day they change my Boss and the other day I got to work with two Bosses (is that a correct word?) LOL. People here yawn in loud voices all the time. I hate that! And there is this mean girl which I keep ignoring and hating more every day. Some girls don’t smile back which is strange. But there still are sweet colleagues, very sweet ones which is good :)


Dear Blog, My bro the blogger "Eb9ara7a" is back from Australia, he kept calling and saying he can’t attend the wedding but then he surprised me at home LOL it was funny when I saw him I was crying & the rest were laughing at me :p I love him, love his wife & their daughter :*

Dear Blog, kafee garga for today :p

-----
ما يصير موضوع بدون صورة :)

Photo taken in Germany 2008

عيدكم مبارك

وكل عام وأنتم بخير وسعادة :)

Happy Gerge3an!

Enjoy the candy everyone :)

I took this pic for my niece last year hehhe :p

Let's pray for Pakistan!

اليوم داومت بعد إجازة مرضية

عملية صغيرة بإيدي الحمدلله
مسكينة هالإيد ثاني مرة تتبنج خلال خمس سنوات :)
-----
تصدقون شنو شفت اليوم الصبح؟
واحد بجيب باترول أبيض وقاعد يدخن !!
وقط الزقارة جدامي
آنا حسيت بشعور غريب والله قلبي عورني
حتى لو الواحد عنده عذر وفاطر
أو حتى لومايخاف من رب العالمين وفاطر
افطر في بيتكم مو جدام الناس !!!
يعني لما الناس تقوم ما تستحي من الغلط والمجاهرة بالمعصية ترا هذا شي كبير
ولما تصير هالتصرفات في وقت الشياطين فيها محبوسة هذا شي أكبر وأكبر
الله يكافينا الشر ولا يبلينا
والله يهديهم
------
ادعوا لإخواننا في باكستان الله ينقذهم من الفيضانات ويعينهم
ويرحم الـ1500 شخص الي اغرقوا
ويشفي المرضى
أكثر صورتين أثروا فيني أحطهم لكم
فعلا الصور تكفي عن كل الكلام !

-----

بنسيم الرحمة وعبير المغفرة أقول

كل عام وأنتم بخير 

May the blessing of Allah (swt) fill your life

with happiness and success :)

Q8 bbq

 :p الأسبوع إلي طاف قاعدة أتمشى داخل الانترنت

وصدفة وصلت مكان "باربكيو" شوي !

الموقع كان غريب وشي ييديد لفت نظري

خصوصا إن شاب كويتي يبيع شغلات جاهزة للشوي وحاط عليها الخلطة وكل شي

ويوصلون للبيت أو الشاليه والمزرعة

عاد آنا كنت بروح العبدلي بعدها بيوم فقلت خل أطلب وأجرب

-----

أول شي معاملتهم وايد حلوة

وثاني شي مواعيدهم مضبوطة

وثالث شي يتأكدون منكم إن الطلب وصل وإذا كل شي أوكي وعاجبكم

:)

-----

الموقع هو 

www.Q8BBQ.com

-----

آنا طلبت سلطة اسمها

3abdely Salad

وعندهم أنواع ثانية بس آنا بما إني بروح العبدلي

قلت لازم سلطة العبدلي عشان يلوق ههه

بس نسيت أصورها :)

-----

وطلبت هوت دوج

بس كان جاهز نفس إلي بالجمعية

-----

إلي عجبني الشغلتين الثانيين

أول شي الـ

Condiments Basket

شكلها يونس وفيها عشر أشياء

-----

"click on any photo for a larger view"

-----

-----

وثاني شغلة الـ

Buffalo Chicken Wings

كان وايد حلو

وهذي صور أثناء وبعد الشوي

-----

-----

-----

-----

وإن شاءالله مرة ثانية نجرب أنواع ثانية

Thank you Q8 bbq!

-----

 آخر جمعة قبل رمضان المبارك :) 

 اللهم بلغنا رمضان و أنت راض عنا غير غضبان 

We will Never forget 2.Aug.1990

لما أتذكر الغزو العراقي الغاشم على دولتنا الحبيبة الكويت

أتذكر عمي الله يرحمه

إلي خذوه أسير بطيارة صغيرة فيها مروحيتين

أتذكر لما رجعوه الكويت بعد الغزو وكان فاقد الذاكرة لأن بالسجن

كان يغلط عليهم ويمدح الكويت فكانوا يعذبونه بالكهربا

وأذكر إن توفى بعد الغزو بجم سنة قبل ما يشوف عياله إلي كانوا أسرى أيضا

-----

لما أتذكر الغزو

أتذكر عيال عمي الله يرحمه ويرحمهم

كانوا توأم متشابه

وكانوا في المقاومة ومتطوعين بالمخبز

يخبزون حق الأهالي ويوزعون أكل على البيوت

وكان واحد منهم متزوج قبل الغزو بجم اليوم

خذوهم أسرى ولي اليوم ما شفناهم

الله يتقبلهم شهداء ويرحمهم جميعا

-----

لما أتذكر الغزو

أتذكر زوج خالتي الي خذوه أسير من المسجد وكان وقتها يصلي صلاة الجمعة

خذوه مع كل الكويتيين الي كانوا بالمسيد

ورجعوه لنا خلال فترة الغزو أيضا

كنت وقتها في بيت خالتي

أتذكر الصمونة إلي طلعها من مخباته يورينا إياها

صمونة يابسة صخررر هذي كانت وجبتهم بالسجون العراقية

-----

لما أتذكر الغزو

أتذكر نقاط السيطرة

وشلون كانوا العراقيين يوقفونه بنص الشارع ويفتشون السيارة

-----

لما أتذكر الغزو

أتذكر سرداب بيت يدي إلي عشنا فيه نص فترة الغزو

ومعانا مو أقل من خمس عوايل كلهم سكان الفريج

-----

لما أتذكر الغزو

أتذكر العيوز إلي بيتها بالمنصورية كانت تبيع حلاو كل الأنواع نروح ونشتري منها

-----

لما أتذكر الغزو

أتذكر المطر الأسود ونقط المطر الملوث بالنفط موجودة على ملابسي خاشتهم لي الحين

-----

لما أتذكر الغزو

أتذكر الخوف خصوصا لما بدت الضربة الجوية وكنت وقتها نايمة فوق

ويت أمي قعدتني وقالت بسرعة روحي السرداب

-----

لما أتذكر الغزو

أتذكر تنكر الماي إلي ايينا كل فترة يسوقونه كويتيين

وكنا نترس درام الزبالة مال الشارع ماي

عشان نغسل منه لأن ماكو ماي!

-----

لما أتذكر الغزو

أتذكر الفوانيس الي نشبهم بالليل لأن ظلمة ماكو كهربا

والظهر لأن ظلمة ماكو شمس بسبب الغيوم السودة من دخان حرائق الآبار

-----

لما أتذكر الغزو

أتذكر بياع الألعاب الهندي بجمعية الفيحا

لي الحين موجود محله بالمواقف

كان يبيع علينا أثاث بيت باربي بأسعار رخيصة

-----

لما أتذكر الغزو

أتذكر الدرايش لما لزقنا عليهم جلاد كتب

عشان ما يتكسرون من صوت القصف

-----

لما أتذكر الغزو

أتذكر لما رحنا بيتنا بمنطقة ثانية ناخذ أغراض

لقينا الباب مكسور وبايقين التلفزيون والفيديو وأشياء وايد

-----

لما أتذكر الغزو

أتذكر خالي لما طقوه العراقيين وربطوه بالسيارة وسحبوه

لأن أبيض وأشقر وعنده نمش

عبالهم أمريكي !

-----

لما أتذكر الغزو

أتذكر لما كنت أتسلق فوق الملحق في بيت يدي

ومرة صعدت جان أشوف خالي مع مجموعة شباب المقاومة

قاعدين دائرة وحاطين خناجر وسجاجين وأسلحة بالنص !

-----

لما أتذكر الغزو

أتذكر العراقية الي كانت لابسة لبس عسكري وجوتي جيش أسود كبير

وحاطة عباية قصيرة على راسها !!

كانت تمشي جدام بيتنا وكنت أطالعها من الفتحة تحت الباب

وكانت إختي الصغيرة منسدحة بالحوش يمي وكنت صاكة حجلها بإيدي

عشان ما تتكلم ويسمعون صوتنا

كان رعب !!

-----

لما أتذكر الغزو

أتذكر لما يمعنا كل الدفاتر والكشاكيل الي عليهم

صورة بابا جابر وبابا سعد الله يرحمهم

وخشيناهم مع أعلام الكويت

-----

لما أتذكر الغزو

أتذكر وااايد أشياء

ووايد مواقف

مستحيل أنسى أي شي منهم

بس إذا كتبتهم يبيلي كتاب كامل :)

-----

يارب تحفظ ديرتنا الحلوة الكويت من كل شر

Ra1 is taken!

عندما تكون الأوسط يتحتم عليك أن تبحث لنفسك

عن هوية لا تشبه الكبار ولا يفهمها الصغار

لكي تكرس فرادتك

كان علي أن أدشن عالمي الخاص

-----

الكلمات السابقة للكاتبة بثينة العيسى تنطبق علي تماما

حيث كنت الأوسط بين إخواني وأخواتي وكنت المختلفة

أو غريبة الأطوار كما يقولون :)

-----

وكما أقول دائما فالحياة رحلة ومحطات

ولأني شاركت مدونتي هذه بمحطات عديدة من حياتي

فلابد أن أشاركها بمحطة مهمة

وهي محطة الزواج

-----

وللمرة الأولى لا أكتب موضوعي وحيدة

ولكن أكتب وبجانبي شخص يقرء كلماتي

ويساعدني على صياغة الجمل والتعبير عن ما يجول بخاطري

وهذا الشخص هو زوجي الذي أحب فكرة هذه المذكرات :)

-----

أسأل الله سبحانه وتعالى أن يوفقني ويوفقكم

ويحقق أحلام الجميع

Working with girls is a disaster!

وأخيرا توظفت :)

بعد استراحة مدتها ستة أشهر زرت خلالها أخي في أستراليا

وزرت الصين في رحلة سريعة مع أخي الذي يصغرني بخمس سنوات

وأختي التي تصغرني بثمان سنوات

كانت من أجمل الرحلات وأمتعها

أخوي أول مرة يروح الصين فآنا وأختي كنا المرشدات السياحيات

تفاصيل الرحلتين عندي في دفتر مذكراتي الذي كان يلازمني بالسفر

أنقل لكم لما ألقى وقت وما أكون كسولة :p

-----

بالنسبة للوظيفة هذا الي بتكلم عنه اليوم

أحس إني بنفجر

وقلت أفجر الشحنات السلبية الي فيني بالبلوق :D

آنا لما قررت أنتقل من القطاع الخاص للقطاع الحكومي

أول شي حطيته في بالي إن المكان لازم يكون فيه شغل

آنا وحدة أحب أشتغل وما أحب الملل والوقت الضايع

ووايد سمعت عن الوزارات وإن الوضع سوالف وأكل ونوم

المكان الي اخترته الحمدلله مثل ما أبي

ومن أول أسبوع عطوني مهام وما وقف الشغل وهذا شي وايد حلو

بس الشي المو حلو كلش

اهوه البنات !

المكان أغلبه بنات ومديرتي مره وانا مو متعودة أشتغل مع بنات

من كثر ما الوضع يبجي قاعدة أضحك :)

إلي تتفلسف علي على أساس إني ييديدة

وإلي تغار مني لأن يبوني أحضر كل الاجتماعات بحكم خبرتي السابقة

والي أسلوبها مو حلو

والي تسأل أسئلة غريبة

والي تخز وما تبتسم

!!!

وماكو نظام

أمس واحد شافني أطالع ساعتي وانا أكتب ساعة الخروج لأن ما سوولي البصمة

جان يقول: كتبي 2:30

قت له الساعة 2:15 ماصارت 2:30 مايصير أزيد الوقت وانا طالعة مبجر

جان يضحك وما يقول شي

-----

بس مابي أظلم الكل في جم بنت حليوين وحبيتهم من أول يوم :)

بس البقية أشياء عجيبة وغريبة

بس هذي ميزة عشان كل يوم أرجع البيت وعندي قصص أقولها

hehhe

إي ونسيت أقول لكم عن المكاتب

آنا منصدمة بس مادري إذا كل الأماكن جذي !!!

مكاتب البنات ليش كأنهم غرف أطفال؟؟؟

والله ما تتخيلون ودي أصورهم وأوريكم

ملزقين ستكرز كل مكان وحاطين ألعاب وريش وردي

وجلاد هدايا مغلفين الطوفة والمكتب وصور عيالهم كل مكان

@@

A package from Japan!

ولي الحين ما تابعت ولا مباراة :)

-----

وصلني طرد من اليابان

من صديقتي أيكو :)

سلة فيها كيك وبسكوت ودبين صغار

أهم شي إن ببيتنا محد رضا ياكل منه يقولون

 مو عارفين مكوناته وشكله ما يشوق

وأمي تقول هذيله بوذيين مادري شحاطين فيه ههه

 آنا جازفت وكليت بس والله حلو :p

The waiting is over!

The World Cup is about to kick off :)

Tagged !!

حده من زمان عن سالفة التاق !!

هبينا فيها فترة بعدين انقطعت

واليوم نرجع لكم بعد ما وصلني الواجب ولازم أحله

-----

قوانين التاج السلطاني

اذكر اسم من طلب منك حل هذا الواجب

تحدث عن ستة أسرار قد لا يكتشفها من يقابلك للمرة الأولى

حول هذا الواجب إلى ستة مدونين، واذكر أسماءهم مع روابط مدوناتهم في موضوعك

اترك تعليقا في مدونة من حولت الواجب إليهم، ليعلموا عن هذا الواجب

-----

نيو برايد هي من طلبت مني حل الواجب

New Bride

-----

عاد ليش أسرار؟

أسراري وايد هههه

بس خليني أختار ستة :)

أول سر

إن فيني برود أعصاب وماعرف أعصب

ويمكن الشي الوحيد الي يخليني أعصب لما أشوف أحد مايحترم أمه أو أبوه أو يقل أدبه عليهم

عاد وقتها يطلع الجانب الشرير من شخصيتي سواء كنت أعرف الشخص أو لأ !

طبعا في شي قبل هذا أكيد يخليني أعصب وهو اذا أحد غلط علي ديني الإسلامي

ثاني سر

إن أكثر بلدة أحبها وأموت فيها: الصين

ومتابعين بلوقي أكيد عارفين هالشي

بس يمكن مو عارفين إني أتكلم صيني وإني لازم أزور الصين كل سنة

وزرتها هالسنة لمدة خمس أيام تقريبا وما كتبت عن هالشي ;)

ثالث سر

كتومة وأحفظ الأسرار

ومادري ليش الناس تحب تخش أسرارها عندي

عندي أسرار الدنيا كلها :p

شي حلو إن أهلي وصديقاتي يثقون فيني للهالدرجة

ويلجؤون لي لحل مشاكلهم أو لمجرد سماعهم

رابع سر

ماحب الخضار وما آكل سلطات واذا باكل شي لازم يكون سادة ومافيه لون أخضر

:)

خامس سر

أحب الحيوانات وايد

بس ماحب الحشرات وأخاف منهم

سادس سر

إذا تكلمت أتكلم بأكثر من موضوع نفس الوقت @@

يعني عادي أقطع السالفة وأدش بموضوع معاكس تماما

رفيجاتي واخواني كله يزفوني على هالحركة لأن يكونون يسولفون بشي

وفجأة بنص السالفة أدش لهم بموضوع ثاني ماله شغل

بس والله الشي يصير تلقائي مو متعمدة :)

-----

وخلصنا الست أسرار والحين أنقل الواجب لست أشخاص

Flamingo

شاي الضحى

Shosho

الوتين

Ananasa

والشخص السادس مفتوح لأي واحد يحب يشارك

:)

صور اعتصام أمس

Yesterday's protest against israel's attack

-----

ابنة الكويتية منى ششتر الموجودة ضمن الأسطول

-----

جانب من الحشد الكبير

-----

الحرية لقافلة الحرية

-----

جيب قناة العربية من دبي

-----

-----

أعتذر عن عدم وضوح الصور لأن كان وايد ظمة :)