Saturday, July 14, 2007

مغامرات !!!

-------
أمس بالليل دست على حديدة :/
أخوي وداني الطبيب
لف ريلي وقزوني إبرة
الظاهر كل صيف تنشق ريلي :)
ما نمت طول الليل حاولت أنام
بس من الألم وكل شوي أتذكر سالفة الصيف إلي طاف
لما انشقت إيدي وريلي والعملية والدم
flash backs :(
ما نمت لي الصبح
قمت أبدل قلت زين أروح الدوام مبجر أكيد في شغل وايد
خصوصا إني ما كنت مداومة الأربعا
طلعت
طبعا تأخرت على الدوام ساعة :p
تدرون ليش؟
-------
بطلع من منطقتنا جان أشوف شي غريب
شايب ضعيف حده وكبير وايد وعلى كرسي
wheel chair
بالشارع مو على الرصيف !!!
بروحه ومحد يمه
وفي بنت بسيارتها واقفة شوية بعيد
استغربت الوضع بس ما وقفت
اتصلت على 777
قلتلهم قالولي إي وصلنا خبر بس قولي لنا وين بالضبط
-------
طلعت من المنطقة وانا مترددة أرجع له ولا لأ
وبعدين شلون محد وقف له كل هالرياييل إلي مروا يمه ولا كأنه شي !!!
جان ألف وأرجع لأن ماحب أتحسف بعدين
الله لا يقوله يندعم ولا شي
رجعت وقفت يمه ونزلت
عمره يمكن 90 ماشالله وايد كبير وريوله لافينها ما يقدر يمشي
مسكين :(
قتله عمي شتسوي أهني؟
ناطر تاكسي !!!
إنزين ليش بالشارع يدعمونك
لا لا ما يدعموني آنا ناطر تاكسي خليني
منو يابك أهني
الخدامة يابتني
!!!
وين بيتكم؟
بيتنا قريب
إنزين وين بتروح بالتاكسي؟
بروح الشويخ
شويخ؟!
إي بروح شويخ أشتري حطب
كل يوم تروح؟
إي كل يوم
بس آنا أول مرة أشوفك !!!
إي ناطر تاكسي
اتصلت على تاكسي؟
لا قاعد أنطر بس ماشوف تاكسي لي الحين
إنزين عمي بيتكم رقم جم؟
قريب قريب
من بيته؟
إنتي ليش بتعرفين خليني آنا ناطر التاكسي
:/
جان أمشي رحت حق البنت بسيارتها
جان تقولي إنها اتصلت على الشرطة ويايين
رديت حق الشايب
عمي ما عندك عيال
جان يصفط واحد وإيي
قالي اشفيه
قتله ناطر تاكسي يقول يابته الخدامة !!
قال له عمي آنا دوامي بالمستشفى الفلاني أوديك؟
آنا يتلي الضحكة يعني في أحد يقول حق شايب أوديك المستشفى
أكيد ماراح يرضى :p
قال له وين عيالك؟
قال مابيهم ماني راد حق عيالي !!!
:/
إنزين شنو عايلتك؟
قال له ليش بتعرف عايلتي خلوني بروحي
جان أقول له عمي معاك بطاقة؟ بطاقتك المدنية؟
قال لا مو معاي
إنزين منو جيرانكم؟
قال ماعرفهم آنا توني ساكن
جان الريال يقول لي ترا شكله مو طبيعي
قتله عمي نوديك البيت الحين ونتصل على التاكسي إيي يوديك شويخ
شرايك؟
قال لا مابي
إنزين عمي انته من بيته؟
قالي العايلة الفلانية
جان أقول العايلة الفلانية؟
قالي فلان الفلاني
!(عايلة غير)
جان الريال يقول الحين ما عرفنا هالعايلة ولا هالعايلة
جان الشايب يعصب
إحنا معروفين شنو ما تعرفون فلان ولد فلان الفلاني
!!!
قاله جم رقم تلفونكم؟
بدق أشخل عياله شلون جذي يخلونه
ما رضى يعطي رقم
قتله
عمي هذا بيتكم؟
تعمدت أأشر على أي بيت عشان يقول لأ
قال لي لأ
عيل هذا؟
قال لا روحي سيدة عند الشير لفي بعدين المدرسة
قام يشرح لي
إي انزين بيت رقم جم؟
جان يعطيني رقم البيت
الريال طالعني! قالي إنتي وين تشتغلين؟
الظاهر عباله محققة LOL
قتله بشركة !
جان أقول له آنا رايحة بيته
المفروض الشرطة بالطريج !
حاولنا انصعده الرصيف ما رضى
-------
رحت أدور البيت
لقيته وعليه لوحة نفس الاسم إلي قاله
أدق جرس محد يرد
لقيت سلك على الباب مربوط سحبته وفتحت باب الحوش
ما لقيت شي بس سيارة
رديت أدق جرس مدة
جان تطلع لي خدامة تركض وخايفة
قتلها وين بابا !!!
قالت مناك
إنتي وديتيه؟؟؟
قالت إي
طلع صج :/
شلون تخلينه بروحه بالشارع واهوه ما يقدر ما يمشي !!!
تقول كل يوم يتهاوش معانا إلا نوديه وينطر تاكسي مرات إييله تاكسي ومرات لأ
كل يوم؟؟؟
لا يوم بالأسبوع
وين يروح؟
يروح سوق السمج مادري وين
بروحه؟؟؟
إي ما يرضى أحد يروح معاه
جان تطلع خدامة ثانية !!!
قتلهم منو في بالبيت
بس ماما كبيرة نايمة
ما عنده عيال؟؟؟
في بنات بس بالدوام
لما يرجعون من الدوام ما تقولينلهم وين راح؟
إمبلا يدرون
إحنا الحين نروح إنييبه
عندكم سيارة !!؟
لا نمشي
شنو تمشون! وحدة بس اتيي معاي
ركبتها ورا
وبالطريج سويتلها تحقيق
وصلنا ولا الشرطة موجودين
قالوا حق الخدامة خلاص وديه البيت
بدون ما يسإلونها ولا سؤال
@@
قتلهم انتوا ودوهم بالسيارة !!!
البيت مو قريب ودواعيس وشمس !!!
قالوا له نوديك؟
ما رضى
قالوا حق الخدامة خلاص وديه !خلوها تدزه
آنا استغربت ومشيت
وايد تضايقت من تصرفهم !!!
اتصلت على أبوي قتله السالفة وعطيته رقم البيت
لازم يكلم عياله وشكلنا بنوديه الأماكن إلي بيروح
يكسر الخاطر :(
شنو هالإهمال !!!
-------
وإذا بتسإلون نفس سؤال أبوي
(لأ ما صورت) :p
-------

30 comments:

Mishari said...

الصراحة اول شى زين سويتى ما صورتى
ثاني شى العمر لما يتثدم تزيد العسارة
يعنى فعلا الواحد يتأثر من اللى قاعد يصير
وتلقين صج عياله مو قادرين عليه وخلوه على راحته وينطرون موته استغفر الله

Ra-1 said...

Mishari ...
أكيد ماراح أصور :/
الشايب مثل الولد الصغير لازم نعامله نفس الأسلوب ونطول بالنا معاه

Ensan basee6 said...

ماشاء الله عليج تحبين تساعدين قولي الحمد لله و مبروك ماياكم
مادري شلون اوادم تهيت امها و ابوها لو شنو. يالله حسن الخاتمه
ذكرتيني مره شفت وحده عيوز بالشاميه كسرت خاطري مادري ليش ما وقفت و اشوه اني ما وقفت طلعت وحدة مو صاحيه لا تطق والسان بعد

Financy said...

sheyyab are nice ..fun to chat with

bs i cant believe that the Ra-1 i know , can do that , o be this jor2a

mashallah 3aleech

Ensan basee6 said...

financy
الشياب يونسون بس لايصيرون متهورين
اعرف شايب متزوج وحده صغيره وهو على ويل جيير والاخ مايتفاهم معاها الا بالعصى والله ضحكني الشايب و طبعا انسى يكون كلامه مشفر

kila ma6goog said...

allah kareem

Anonymous said...

the typical sweetness of u

Purgatory said...

أول شي سلامات، صج كل صيف دايسة على شى، وبالنسبة حق الشايب أنا أعتب على عياله، حتي لو يعاند، ريال عود
و لازم يديرون بالهم عليه

Kuw_Son said...

أول شي الحمدلله على سلامتج و خطاج السو و ما تشوفين شر :)

شكلج قاعدة تلعبين بالسكة و حافية
:P

المهم .. هذول عياله جاسين قلب !!

شنو جذي أبوهم كل مرة يسوون فيه !!

حايشه خراف الظاهر !!

الحمدلله الذي عافانا ..


لو مصورة
:P

Ra-1 said...

Ensan basee6 ...
قصدك معصومة !
I know her heh :)

Financy ...
I can be strong sometimes :p

Ra-1 said...

kila ma6goog ...
yeah :(

Anonymous ...
Thanks!

Ra-1 said...

Purg ...
الله يسلمك :)

Kuw_Son ...
بغرفتي مو بالسكة :p
شكله طبيعي مو مخرف :/

Q8-Student said...

ma tshofen shar inshallah !!

wo zeen tsawen

allah ekather men amthalech 11

loyalty said...

ماتشوفين شر يا Ra-1
تذكري ، حتى الشوكة يشاكها فله الأجر=)

و على قصة الشايب ، فأذكر إنه كانت من أهم تحذيرات الأهل لي أول ما سقت ، إني ما أوقف حق أحد أياً كان!
لأنه يدرون فيني عادي أوقف بنص الشارع :>
والله شكلي عقب موقفج الإنساني .. بعيد النظر بهالموضوع ;p

btwمبروك ما ياكم

Anwar Al-Ballam said...

الشجاعه والشهامه من طبعج :P

لووووول على سالفة ايدج ليكون تقصدين يوم الشاليه ؟؟؟؟؟
اذا اي لوووووول :P~

تضحكين علي تقولين ماطلعلج العقل
انا مادست على حديده :P~

Yara said...

mshalla 3alich wayd wayd zain eli sawaiteeh enshalah kela ajer :)

Nescafé said...

ماادري ليش هالاهمال.. لا وكل مره يخلونه جذي
!!

مهما كانو عياله مشغولين المفروض يضبطون بينهم وبين بعضهم بس مايخلونه بروحه

ماادري ليش في ناس مايحسون بوالدينهم الا لما يفقدونهم... الله يهديهم

Nescafé said...

على فكره .. انا متابعه دايمه
على الرغم من قلة ردودي
:)

Ra-1 said...

Q8-Student ...
الشر ماييك مشكور :)

loyalty ...
الشر ماييج :)
لا لا تعيدين النظر بالموضوع وبعدين أهلج يبلشوني :p

Ra-1 said...

Anwar Al-Ballam ...
LOL :p

إي سالفة الشاليه !!!
ماشالله متذكرها :/

إشدخل ضرس العقل بالحديدة heh :)

Yara ...
:)

Ra-1 said...

Nescafé ...
فعلا في ناس ما اتحس إلا لما تفقد الشخص
and when its too late :/

متابعتج تسعدني :)

بوغازي said...

شيء محزن أن ينتهي بنا المطاف في آخر العمر كما انتهى بهذا الشايب... نسأل الله لنا وله العافية... والحمد لله الذي عافانا مما ابتلى به كثيرا من خلقه وفضلنا على كثير من عباده تفضيلا
.
قصة مؤلمة... إلا أن ما يخفف ألمها هو موقفج الانساني والنبيل.. فجزاك الله خيرا
:)

Ra-1 said...

بوغازي ...
I didnt do anything :)

Kuw_Son said...

الظاهر ان غرفتج صايرة ورشة .. فيها جزاز و مسامير
:P

Judy Abbott said...

wala 6ela3tay thakeeya ..
khala9 sama7tich :P madry 3ala shino bs sama7tich


khoosh bint

DanDash said...

سلاماتج و ماتشوفين شر ان شاء الله ديري بالج على عمرج
اما عن قصة الشايب جزاك الله الف خير
عياله ... مافي كلمة توصفهم الله يسامحهم على الي قاعدين يسوينه في ابوهم
الي يعور القلب صج انه لما اكون مع امي لما يكون عندها موعد في الأميري اروح معاها خصوصا فهل الفترة لانها اجازتي اما وقت دوامي ما اقدر المراد من كلامي لما اكون هناك و اشوف مرة عجوز ولا ريال شايب و ما يقدر يدبر عمره و هل البنغاليه يدزه دز بالويل
شير وما يقدر يدبر عمره وينكم عنه ليش مخلينه بروحه هذا السؤال
وتعرفين شلون صايره العيادات يبلها مجابل يا مضيعين نتيجة التحليل ولا مضيعين الملف وووو
الله المستعان

ROOGYz said...

الصراحه حدده كسر خاطري الشايب :(
شصار عليه الحين؟؟
بيتكم كلموا بناته ..؟

طمنيني ترا من صجي احاتي!!

Ra-1 said...

Kuw_Son ...
LOL!
كنت أغلف هدايا :)

Judy ...
:p

Ra-1 said...

Dandash ...
الله يسلمج
والله يشافي الوالدة

Roogyz ...
لا والله لي الحين ما كلموهم

Chroma-Trauma said...

مسكين هالشيبة , و الله شيء يقطع القلب , لما نشوف هالإهمال في حق من كبرونا و علمونا ..الله المستعان
, يا ليت عياله يشوفون شلون الغريب يعامل ابوهم و هم لاهيين عنه و مو فاضيين له .
ما نقدر نتهمهم, لأننا ما نعرف ما يدور داخل البيوت .. بس الله يحنن قلبهم عليه. و جزاك الله خير على اللي سويتيه ...

.. و خطاج السوء , ان شاءالله تكون اصابة طفيفة