Sunday, April 27, 2008

تربينا على الأمانة


-----

يبدو أن النقاش بالتعليقات على مواضيع بعض البلوقرز الليبراليين لن ينتهي!

لذلك أكتب هذا الموضوع توضيحا لتساؤلات الأخت بنت الشامية

والأخ حسافتج يا كويت ولغيرهم ممن يروجون لكلام غير منطقي واتهامات

ينسبونها للحركة الدستورية الإسلامية

-----

أولا: أي كلام سيء عن حدس لن يؤثر فيها أو يقلل من شعبيتها أو يضرها! بل على العكس

أراه يزيدها قوة ! فنصيحة مني ركزوا على تطوير مجموعتكم وتنظيمها

وتحسين صورتكم بالمجتمع بدل تضييع الوقت هذا

:)

-----
ثانيا: نقطة أن حدس من وين لها فلوس حق حملتها الانتخابية؟

كلام ليس بجديد آنا شخصيا لاحظت إن عندكم مصطلحات وجمل تحبون تكررونها وكأن كل فترة يحفظونكم شي

وكل واحد كلامه نفس الثاني! مثلا من أول ما دشيت الجامعة لما طلعت وانا أسمع الائتلافية من وين لها فلوس؟؟؟

:p

-----

ثالثا: الحين كل هالمرشحين إلي إعلاناتهم تارسة التلفزيون والراديو ليش ما قلتوا من وين لهم فلوس؟

اوقفت على حدس وإلي اهيه مو مرشح مستقل ولكن مجموعة ولها مؤيديدن بأعداد كبيرة ماشاءالله

فعلا أستغرب شلون تسئلون من وين الفلوس !!!

ترا الآلة الحاسبة تحل كل مشاكلكم :)

-----

رابعا: أعضاء حدس ومحبين حدس ناس أمناء مو انتوا إلي تقولون عنهم بواقين

والحمدلله مو محتاجين نبوق عشان نثبت للناس إن دعاياتنا الأكثر أو حملتنا الأكشخ

والله عيب

-----

خامسا: بيت الزكاة إلي تقولون إن ناخذ فلوسه جهة حكومية يراقب شغله

مجلس الوزراء وديوان المحاسبة وهناك تقرير مالي دوري مفصل يعني في رقابة مالية من الحكومة عليه

-----

سادسا: الحملة ما كلفت 7 ملايين مادري وين اتييبون أرقامكم!

ولو احتجنا 7 ملايين فأعضاء حدس ناس عقولهم كبيرة

وتفوقوا بدراستهم وانجحوا بحياتهم وأسسوا شركاتهم الخاصة

وتجارتهم وقادرين على التخطيط والتدبير

(لو عندنا 7 ملايين جان سوينا جريدة يومية مو قطيناها على انتخابات)

-----

سابعا: إحنا حركة منظمة تعلمنا النظام والالتزام عندنا اشتراكات شهرية يعني من سنين واحنا نوفر!

نخطط حق جدام ... تعلموا منا وسووا نفس الشي

-----

ثامنا: غير قطية الانتخابات لما تحتاج حدس حق شي معين

محد يقصر ! كل واحد يدفع مبالغ إضافية حسب رغبته وقدرته

-----

تاسعا: تردون وتقولون شنو مصلحتكم؟ مصلحتنا إن يدخل المجلس ناس يدافعون عن الدين

الإسلامي ويحاربون الفساد ناس نثق فيهم ونعتقد إنهم الأكفأ والأصلح

ناس تهمهم مصلحة البلد قبل أي شي ثاني

-----
عاشرا: إلي ما عندهم سالفة إلا حدس ترا مو غصب تحبون حدس

وكتاباتكم قاعدة تتعب نفسياتكم وتستنزف من طاقاتكم مو زين حق صحتكم

Relax :)


أمس وحدة تقولي بأسلوب استفزازي

آنا ماراح أصوت حق حدس

آنا ضحكت من داخلي وابتسمت وبكل هدوء قلت لها

لا تصوتين! مو محتاجين صوتج عشان نفوز

إهيه انصدمت توقعتني أقنعها وأدش معاها بنقاش طويل وعريض

ترا كل واحد حر وكل واحد وضميره

بس خلونا حبايب ترا ما تسوى الانتخابات كل هالعصبية والغيرة والتجريح

خلوها منافسة حلوة وخل نستانس فيها :)

---

آنا مريضة ومو مداومة اليوم قلت أتسلى بهالموضوع

ما توقعت يصير هالطول إن شالله يكون مفهوم

n_n

---

25 comments:

Blogger said...

عااااااااشت

Purgatory said...

مريضة و كاتبة بوسط

;p

انا أقول روحي ارتاحي و بسج بولوتيكس، لاحقة على هل السوالف

Hasan.B said...

The question is why are you mad? People have the right to criticize a political party. A very bad political party actually. Mohamed Al-bsairi sits in Al-watan opening with the music playing 3ade mafe mashakil? What islam is that? And defending islam? By implementing stupid rules such as segregation?? Is that how we defend islam? By telling the world that we are animals and can not live together in a working environment?

Ra-1 said...

BB ...
:)

Purg ...
هاهها لا وبطلع الحين
:p مادري ليش بس وقت الدوام أصير مريضة

Hasan ...
Who said I am mad?!!
Also people have the right to defend their political party :)

Mohammad Al-Yousifi said...

شنو هالشراسة المفاجأة؟

وين الاولية؟

Big Pearls said...

plz don't go all political:/

Ra-1 said...

kila ma6goog ...
هاهها :p
آنا الأولية ما تغيرت :)
محد شرس إلا إلي رديت عليهم !

Big Pearls ...
InshaAllah :)

mantovani said...

مساء الخير

تحية طيبة و بعد

الحقيقة شي طيب و يثلج الصدر ان في انسانة كويتية تدافع عن رأيها السياسي بشراسة ... الحمدالله تطورنا


لكن عندي تساؤل بسيط

ليش انتي منضمة لحركة سياسية
تعتبر ان صوتج و مشاركتج في اختيار منصب الولاية العامة
حرام
حرام
حرام
حرام

و الحين عندكم لجان نسائية اتييب لكم الاصوات الحرام ؟؟؟

غريبة بصراحة

انا مو قاعد اشكك بالذمة المالية
و لا نقول من وين لكم

بس تساؤلاتي بريئة


مانتوفاني

بصمة منـــارية (: said...

السلام عليكم ورحمة الله وبركاته ..

جميل جدا .. تصدقين كل ما اشوف ذا الهجوم الشرس على حدس خصوصا من الليبراليين مروجي الاشاعا استانس و اقول .. الصراخ على قدر الالم ..

(:

حدس قدمت مالم تستطع أي جملعة أو حزب أن يقدمة .. حدس كشفت الذمة المالية لمرشحيها فهل فعل الليبراليون ذلك ؟؟

حدس قدمت العديد من الاقتراحات و القوانين في المجلس السابق .. فهل فعل الليبراليون ذلك .. أم اكتفوا بالتطبيل و التصفير على قانون منع الاختلاط والغاءه للفت الانظار و استقطاب الجماهير ؟؟

حدس قامت بعمل مؤتمر لناخبيها و مثل جميع مرشحيها أمام الناس للاستجواب فهل فعل الليبراون ذلك ..

حدس لم تكتفي بالجانب السياسي فحسب بل لها رؤية اصلاحية ونظرة دينية و قيمية واجندة واضحة ومعلنة فه يملك الليبراليون ذلك ..

تعالي صج الليبراليين على هالخبة عندهم على الاقل

web site

ندخل نعرف اخر اخبارهم ولا بس حي ..؟؟

تحياتي للبوست الرائع

بصمة منارية

بصمة منـــارية (: said...

مشاركتي فيها وايد بدليات .. اعتذر بس يمكن السبب لاني دايخة..

ذا = هذا

جلمعه = جماعة

فه=فهل

web site= website

حي = حجي

(:

Catism القطويّة said...

سلامات، أجرا وعافية :)
مجرد كلام يلقى على عواهنه دون دليل ملموس، فلا تهتمي كثيرا.

صدقتِ، تربينا على الأمانة.

إليك هذا:
http://www.catism.org/2008/04/28/%d8%b9%d9%86%d8%af%d9%85%d8%a7-%d9%8a%d8%ad%d8%b3%d8%af%d9%88%d9%86-%d8%ad%d8%af%d8%b3/

Catism القطويّة said...

رابط أقصر:
http://www.catism.org/2008/04/28/7ads/

باغي الشهادة said...

تفاجأت ياروان بعد أن كتبت مقالي بدقائق بأنك والقطوية كلنا عن نفس الموضوع

:-)

فلم أستأذنكما بتحديث تدوينتي والإشار إليكما
:-)

كيفي :-p

Ra-1 said...

mantovani ...
كلامك مو صحيح
منو منا قال إن حرام؟ ومتى؟

بصمة منـــارية (: ...
Welcome to my blog!
كثرة كلامهم عن حدس تثبت إن حدس وايد مهمة
:)

Ra-1 said...

Catism ...
و باغي الشهادة ...

لو كنا متفقين جان ما كتبتنا نفس الفكرة وفي نفس الوقت :p
سبحان الله !
بس السؤال الحين
منو أول واحد فينا كتب؟؟؟
:)

AAajed said...
This comment has been removed by the author.
AAajed said...

I don’t know what the benefit is, if the candidate wins the elections. What she can do?? What is her authority?? Is she has plenipotentiary for her decision or she should obey for the government.

If the government can re-elect or cancel the parliament without reasons the election in Kuwait is a move just for fun.

Thanks.

Saudi citizen

mantovani said...

مرحبا روان

روان انا احب اوضح لج اني لست ندّا انتخابيا لك الان

و لست اكسب من ورائك مكسبا

ولكن حدس ضد الحقوق السياسية للمرأة

رموز حدس رفضوا حتى حق المرأة في المشاركة بالمجلس البلدي

==

اتمنى اني ما كنت متجني على حدس طول هالمدة

و اذا في شي يغير بوجهة نظري اتمنى انج
تنوريني

مانتوفاني

بوشملان said...

صراحة اول مرة ادش مدونتج بس وعد او مو وعد الا ما اقدر اني ادش الانترنت بدون ما اشوف مدونتج
كلام راقي وطرح متزن مدلل عليه بالحجج ويقولون نساء حدس قاصين عليهم
والله نساء حدس عن الف رجل من اللي بالبال

ولو تقبلين دعوة مني لزيارة مدونتي المتواضعه
http://m3m3ah.blogspot.com/

Ra-1 said...

AAajed ...
Who said that they should obey?
بالعكس دور النواب وايد فعال ومؤثر
دور تشريعي ورقابي
مثال :
التصويت على القوانين
قانون جديد
تعديل قانون
إلغاء قانون
قرارات
مشاريع
وغيرها !
:)
الحمدلله مازالت الديمقراطية بالكويت موجودة على عكس دول كثيرة

Ra-1 said...

mantovani ...
لي الحين على موضوع حقوق المرأة السياسية؟؟؟
آنا إلي أعرفه إنهم كانوا ضد الترشيح وليس التصويت

بو شملان ...
حياك الله
ومشكور :)

AAajed said...

Ra1:
I mean if there is new decision on the table of negotiation. The governments wait for the last decision. If the last decision came with there desire every thing will be OK but if it’s not came with desire of the government they will re-elect or cancel the parliament.

"يعني الدعوة صايرة حسب المزاج"

صحيح ان الكويت متقدمة خطوة عن جيرانها في اتجاه الديموقراطية ولكن كنت اتمنى هذا التقدم يتطور الا خطوات نحو الأفضل. ولكن حسب متابعتي البسيطة للأنتخابات في الكويت اراها للأسف قد توقفت مكانها هذا ان لم تكن متراجعة.

ماجد

hamoora said...
This comment has been removed by the author.
hamoora said...

يصعب علي التعقيب كلام رائع
جزاك الله خيرا

http://hamoora.blogspot.com/

Ra-1 said...

AAajed ...
أوافقك في أن الديمقراطية ق تراجع بالكويت
الله يستر

Hamoora ...
شكرا وحياج الله :)