-----
I'm in the mood for a long post ...
-----
رأيتها صدفة
أعرفها نعم
ولكن من هي !
ألتفت إليها مرة أخرى وعقلي يعمل
أتذكر ولا فائدة
تلاحظ خزاتي :p
فتأتي باتجاهي وتسلم علي
آنا أعرفج
إي حتى آنا بس مو قادرة أتذكر
شسمج؟
Ra-1
Ra-1 انتي ويييييييينج
شخبااارج؟
آنا محفظتج بالمسيد !
-----
خنقتني العبرة :/
-----
تذكرت المسجد وأيام حفظ القرآن الكريم
وكيف أنه قبل أيام كنت ألوم نفسي أني توقفت عن الحفظ قبل حوالي ثلاث سنوات
:(
والسبب ببساطة أن حلقة حفظ القرآن التي كانت في أحد مساجد منطقتنا توقفت
وانتقلت المجموعة التي هي عبارة عن أطفال بالروضة والابتدائي إلى منطقة أخرى
صحيح أني انشغلت ولكن لا يبرر عدم انتقالي معهم إلا كسلي وإهمالي
-----
عدت بوعيي إلى صوتها تحدثني
وينج من زمان !
خجلت من نفسي
تدرين بنرجع منطقتكم
صج !!؟
:D
سجليني الله يخليج
آنا ضايق خلقي إني مو قاعدة أحفظ قرآن
كنتوا تشجعوني وتتابعوني
عطيني رقمج راح أخليهم يتصلون فيج
راح نكون نفس المسيد؟
مسيد لا!!! انتي قديمة
الحين نداوم في مدرسة صفوف وكورسات وامتحانات
@@
يعني شلون صفوف؟ ما نقعد عالأرض
هاهها لا انتي تبين الجو الأولي !!!
-----
مادري ليش عورتني كلمة الجو الأولي
حسيت إن شي خلص وماراح يرجع
:/
جان تقط قنبلة ثانية وراها
تبين المجموعة القديمة بعد؟
إي طبعا
لا قبل كنتي الوحيدة كبيرة بين يهال
الحين صرنا مجموعات وايد وقسمناكم عالأعمار
راح يكون معاج ناس من عمرج وناس أكبر وحريم كبار
!!!
وانا مو محفظتج آنا الحين مديرة المركز
-----
اتصلت فيني سكرتيرة المركز بعدها بجم يوم وقالت لي أروح أكمل بياناتي
حضرتي ما فظيت إلا بعدها بمدة وتذكرت واتصلت على المحفظة إلي شفتها بالغبقة
Ra-111111
الله يهديج
اتصلنا فيج انتي وينج
بدينا من زمان ! روحي الحين وسإلي عن فلانة
-----
رحت مدرسة لصبيان !
قعدت أدور السكرتيرة لما لقيتها
ما لقوا اسمي وقالولي روحي ونتصل فيج
بعدين اتصلوا وقالولي لقينا التراكمي مالج وخلاص تعالي داومي هالأيام
رحت اليوم الي مفروض أداوم فيه
ما أدري أي صف !!!
إلي اتصلت علي مو مداومة
دلوني على وحدة بالإدارة
كلمتها جان تعصب
انتي شلون بتداومين !
آنا مو فاهمة شلون اقبلوج!
صارلنا ثلاث أسابيع مداومين
شلون بتلحقين !
-----
آنا بفهم شنو إلي حارج إذا آنا انقبلت !!!
ليش متضايقة؟
إذا ما طفت الامتحان بعدين سقطيني شنو المشكلة
بس ليش ما تبين لي الخير
آنا أبي أحفظ قرآن مو ياية ألعب
-----
طبعا هالكلام قلته بقلبي
:p
-----
قالت لي بندور ونتصل فيج :/
كثر ما كنت مستانسة كثر ماضاق خلقي
الحين مرتين أروح ويردوني :(
المهم وانا طالعة من المدرسة قعدت أطل بالصفوف
جو كئيب الصراحة
وين أيام المسيد والحلقات عالأرض
وين اليهال إلي كنت أساعدهم بالحفظ
والشاطرة أعطيها حلاو وستكرز
:)
ولما نخلص أقول لهم قصص
والله أيام حلوة كان وناسة
-----
سبحان الله كل شي يتغير
شكلي لازم أتأقلم مع هالجو ومع هالناس اليدد
أهم شي عندي الحين أكمل حفظي
بجرب حظي هالأسبوع إن شالله يسجلوني
-----